Raporti i publikuar një ditë më parë nga Komisioni Qendror i Zgjedhjeve (KQZ) tregon se Partia Demokratike e Shqipërisë kryesoi shpenzimet e fushatës për zgjedhjet parlamentare të majit 2025.
Sipas dokumenteve, drejtuesi i fushatës së PD-së, Chris LaCivita, ka marrë 139,111,686 lekë (rreth 1.4 milion euro) për shërbimet e tij të konsulencës, të shpërndara në katër pagesa gjatë vitit.
Lajmi u përhap ndërkombëtarisht, pasi prestigjiozja The New York Times i dedikoi një artikull. Sipas NYT:
Konsulentët që punuan për fushatat presidenciale të Donald J. Trump morën mbi 1.6 milion dollarë për të këshilluar PD-në mbi strategjinë e saj për zgjedhjet në Shqipëri.
Pagesa për firmën e LaCivita-s, Advancing Strategies, ishte ekuivalente me mbi 1.62 milion dollarë, ndërsa firma e Tony Fabrizio mori pothuajse 65,000 dollarë për sondazhe.
LaCivita, Fabrizio dhe Paul Manafort (ish-drejtor i fushatës së Trump-it në 2016) punuan së bashku për të promovuar ish-presidentin Sali Berisha si figurë të ngjashme me Trump-in.
Shkrimi i NYT thekson se, pavarësisht përpjekjeve të konsulentëve amerikanë, PD humbi zgjedhjet parlamentare ndaj Partisë Socialiste të Kryeministrit Edi Rama. Pas humbjes, LaCivita mbështeti pretendimet e Berishës se zgjedhjet ishin të manipuluara, por rinumërimi nuk konfirmoi këto akuza.
Gjithashtu, raporti përmend se Berisha është i përfshirë në hetime për korrupsion në Shqipëri dhe është sanksionuar nga administrata Biden në vitin 2021 për “korrupsion të konsiderueshëm”, sipas deklaratave të ish-Sekretarit të Shtetit Antony Blinken.
Sipas NYT, konsulentët politikë amerikanë që fitojnë zgjedhjet presidenciale shpesh paguhen lart për të ofruar shërbime në fushata të huaja, duke i bërë të kërkuar nga partitë politike në mbarë botën.
LaCivita udhëtoi disa herë në Shqipëri gjatë fushatës, ndërsa ai dhe Manafort refuzuan të komentojnë mbi pagesat dhe strategjitë e përdorura për promovimin e Berishës.
