Ish-kryeministri Sali Berisha ka reaguar pas vendimit të Gjykatës së Posaçme Kundër Korrupsionit dhe Krimit të Organizuar (GJKKO) për të shtyrë seancën e parë gjyqësore në çështjen e njohur si “Partizani”.
Në një deklaratë të gjatë publike, Berisha e cilëson gjyqin si politik dhe akuzon qeverinë dhe drejtësinë e kontrolluar nga ajo për një proces të fabrikuar me qëllim goditjen e tij dhe familjarëve të tij.
“Sot fillon procesi gjyqësor politik në GJKKO për dosjen ‘Partizani’, fund e krye një piramidë mashtrimi,” – shkruan Berisha, duke e lidhur nisjen e çështjes me një urdhër të drejtpërdrejtë të Edi Ramës në Kongresin e PS-së në prill 2022.
Berisha mohon akuzat për korrupsion dhe pretendon se nuk ka asnjë provë që ai ka përfituar në mënyrë të paligjshme nga procedurat e privatizimit të tokës së ish-kompleksit sportiv “Partizani”, ku përfshihet edhe dhëndri i tij, Jamarbër Malltezi.
Sipas tij:
Toka ka qenë pronë private e trashëguar, dhe jo tokë publike e shpronësuar.
Nuk ka pasur dëm ekonomik ndaj shtetit dhe asnjë metër tokë publike nuk është përvetësuar.
Akuzat janë të ngritura mbi një kallëzim të rremë të Taulant Ballës dhe të mbështetura në dokumente të pabazuara.
Berisha thekson se pas pesë vitesh hetimesh dhe kontrolli të imtësishëm mbi pasurinë e tij dhe të familjarëve, nuk është gjetur asnjë pasuri e pajustifikuar, përveçse kursimeve të 54 viteve punë dhe një apartamenti modest.
Ai akuzon prokurorinë se ka shpallur si korrupsion pagesat familjare për pushime, ndihmat për fëmijët autikë në Qendrën e drejtuar nga bashkëshortja e tij Dr. Liri Berisha, si dhe një donacion prej 4,600 eurosh për një aktivitet artistik të organizuar nga Presidenca.
“Drejtësia politike nuk do ta shpëtojë Edi Ramën nga fundi që e pret. Ai ka ngritur pushtetin mbi krimin, drogën dhe mjerimin,” – përmbyll deklaratën Berisha.
