Një tjetër alarm serioz është ngritur mbi funksionimin e Agjencisë Kombëtare të Barnave dhe Pajisjeve Mjekësore (AKBPM), lidhur me mënyrën se si po ushtrohet përgjegjësia ndaj shëndetit publik dhe sigurisë së pacientëve onkologjikë.
Sipas burimeve të besueshme, një medikament antitumoral i prodhuar në Maltë dhe i përfaqësuar në Shqipëri nga shpërndarësi farmaceutik Megapharma, dyshohet se nuk ka përmbushur kriteret laboratorike gjatë analizave fillestare, por pavarësisht kësaj ka vijuar procedurën e regjistrimit për autorizim tregtimi.
Burimet bëjnë me dije se mostrat e para të dorëzuara për analizë kanë rezultuar problematike, ndërsa më pas janë zëvendësuar me mostra të tjera, çka ka mundësuar kalimin e fazave të mëtejshme të procedurës. Një praktikë e tillë, nëse provohet, përbën një shkelje të rëndë të standardeve të sigurisë farmaceutike dhe ngre shqetësime serioze për rrezikimin e drejtpërdrejtë të jetës së pacientëve që trajtohen me këto barna.
Në këtë kontekst, lindin disa pyetje thelbësore:
pse janë pranuar mostra të reja pas dështimit të analizave fillestare, kush e ka marrë këtë vendim dhe a po vepron Agjencia e Barnave si garant i sigurisë së produkteve farmaceutike apo thjesht si një hallkë formale administrative.
Agjencia Kombëtare e Barnave ka detyrimin ligjor dhe moral të sqarojë publikisht procedurat e ndjekura, rezultatet reale të analizave laboratorike dhe arsyet pse një produkt i kontestuar ka kaluar filtrat zyrtarë. Shëndeti i pacientëve, veçanërisht atyre onkologjikë, nuk mund të trajtohet si statistikë apo formalitet burokratik.
Ndërkohë, Top Channel i është drejtuar zyrtarisht AKBPM-së me një sërë pyetjesh, duke kërkuar informacion mbi numrin e aplikimeve gjatë vitit 2025 për autorizimin e tregtimit të medikamentit Nilotinib, operatorët përkatës, analizat e kryera, rezultatet e tyre dhe masat e marra në rastet kur janë konstatuar probleme. Po ashtu, është kërkuar të sqarohet nëse ka pasur trajtim të diferencuar të aplikimeve dhe cilët operatorë kanë përfituar autorizim tregtimi.
