Gjykata e Posaçme Kundër Korrupsionit dhe Krimit të Organizuar ka lënë në fuqi masën e sigurisë “arrest me burg” për kryetarin e Bashkisë së Tiranës, Erion Veliaj, në kuadër të hetimeve të thelluara për korrupsion dhe pasuri të dyshimta.

Po ashtu, GJKKO ka konfirmuar masën “arrest në shtëpi” për Elman Abulen, një tjetër person i përfshirë në të njëjtën çështje penale.

Avokatët mbrojtës të të pandehurve kërkuan ndryshimin e masave të sigurisë duke propozuar zëvendësimin me masa më të buta dhe ofruan garanci pasurore. Megjithatë, trupa gjyqësore refuzoi kërkesën, duke e konsideruar të pamjaftueshme për të ndryshuar rrezikshmërinë e situatës.

Në këtë seancë, Prokuroria e Posaçme paraqiti një element të ri hetimor: një apartament i vendosur pikërisht mbi banesën e Veliajt rezulton të jetë në pronësi të tërthortë të çiftit Veliaj–Xoxa, fakt që shton dyshimet për pasuri të padeklaruara ose të fshehura. Kjo provë e re u konsiderua si një argument që forcon indiciet për përfshirjen e zyrtarëve në veprimtari të jashtëligjshme.

Hetimet vijojnë, ndërsa SPAK pritet të thellojë kontrollet për pasuritë dhe lidhjet e mundshme të kryebashkiakut me subjekte private.