Çmimet e arit arritën një tjetër nivel rekord të hënën pasi investitorët rritën bastet e tyre si strehë e sigurt pasi Presidenti i SHBA-së, Donald Trump, rinovoi kërcënimet për tarifa kundër Kinës, ndërsa pritshmëritë për ulje të normave të interesit në SHBA shtuan joshjen drejt metalit të çmuar.
Edhe argjendi kërceu në një kulm historik të të gjitha kohërave, duke ndjekur rritjen e arit. Ari spot (i menjëhershëm) u rrit me 1.4% në 4,075.29 dollarë për ons, pasi kishte arritur një rekord prej 4,084.75 dollarë/ons. Kontratat e arit në SHBA për dërgesën e dhjetorit u rritën me 2.4% në 4,094.90 dollarë/ons.
Trump ndezi përsëri luftën tregtare të SHBA-së me Kinën të premten, duke kërcënuar me tarifa 100% mbi importet e mallrave kineze në Shtetet e Bashkuara dhe duke njoftuar kontrolle të reja të eksportit mbi softuerin e rëndësishëm deri më 1 nëntor, në një hakmarrje kundër Pekinit që kufizoi eksportet e mineraleve vendimtare, shkruan Reuters.
Megjithatë, Trump, duke postuar në Truth Social të dielën, shkroi: “Mos u shqetësoni për Kinën, gjithçka do shkojë mirë!”
Argjendi spot u rrit me 2.4% në 51.48 dollarë/ons, pasi arriti një rekord të lartë prej 51.70 dollarë/ons, i nxitur nga faktorë të ngjashëm si ari, përveç shtrëngimit në tregun spot.
Goldman Sachs tha të dielën se çmimet e argjendit pritej të rriteshin në afat të mesëm për shkak të flukseve të investimeve private, por paralajmëroi për paqëndrueshmëri të lartë afatshkurtër dhe rreziqe në rënie në krahasim me arin.
