Qeveria shqiptare ka miratuar marrëveshjen e grantit të Bashkimit Evropian me vlerë 60.5 milionë euro, për ndërtimin dhe modernizimin e linjës hekurudhore Durrës–Rrogozhinë, pjesë e rëndësishme e “Korridorit VIII”.
Lajmi u konfirmua nga Ministrja e Infrastrukturës dhe Energjisë, Belinda Balluku, e cila theksoi se kjo linjë do të shërbejë si një nyje strategjike që lidh Shqipërinë me Italinë, Bullgarinë dhe Maqedoninë e Veriut, duke pasur përfitime jo vetëm civile dhe ekonomike, por edhe ushtarake.
“Qeveria shqiptare ratifikon marrëveshjen e grantit të BE prej 60.5 mln euro për linjën hekurudhore Durrës–Rrogozhinë, një nyje e rëndësishme kjo e ‘Koridorit VIII’… Investimi kap vlerën e 120.5 mln eurove dhe do mbulohet me grant nga BE-ja dhe kredi nga Banka Europiane për Rindërtim dhe Zhvillim, si edhe Banka Europiane e Investimeve,” shkroi Balluku në rrjete sociale.
Projekti parashikon modernizimin e 34 km linjë hekurudhore, elektrifikimin, vendosjen e standardeve evropiane dhe arritjen e shpejtësisë deri në 120 km/h.
Financimi total prej 120.5 milionë euro do të mbulohet nga:
60.5 milionë euro grant i BE-së,
30 milionë euro kredi nga Banka Europiane e Investimeve (EIB),
30 milionë euro nga Banka Europiane për Rindërtim dhe Zhvillim (BERZH).
