Ish-kryeministri dhe ish-presidenti, Sali Berisha, ka dalë me akuza të ashpra ndaj kryeministrit Edi Rama, lidhur me amendamentin e propozuar nga PS, duke e cilësuar këtë akt si antikushtetues dhe tepër të rrezikshëm. Në fjalimin e tij, Berisha theksoi se ky amendament synon t’i japë kryeministrit, zëvendëskryeministrit dhe ministrave mbrojtje që Kushtetuta nuk ua ka dhënë, duke tejkaluar qartë parimet kushtetuese.
“Edi Rama duhet të japë menjëherë dorëheqjen. Ai po konsumon çdo orë, çdo ditë që qëndron në detyrë grushtin e shtetit brenda shtetit,” tha Berisha. Ai shtoi se, sipas Kushtetutës, për funksionet kushtetuese të organeve, “atë që nuk ka dashur të bëjë Kushtetuta, nuk mund ta bëjë ligji.”
Berisha u ndal tek parimi themelor i sanksionuar në frymën dhe germën e Kushtetutës, sipas të cilit organet kushtetuese si Kryeministria, KLSH dhe ministritë nuk mund të marrin mbrojtje shtesë përveç asaj që i ka dhënë ligji themelor i vendit. “Kushtetuta nuk ka dashur të mbrojë kryeministrin, ministrat apo KLSH-në nga pezullimi, dhe nuk mund ta bëjë ligji këtë,” tha Berisha.
Ai theksoi gjithashtu se kjo nuk është vetëm një çështje kushtetuese, por edhe një precedent juridik i vendosur nga Gjykata Kushtetuese. Sipas Berishës, në vitin 2002, kur parlamenti miratoi një ligj për të mbrojtur kryetarin e KLSH-së, vendimi numër 212 i Gjykatës Kushtetuese hodhi poshtë këtë amendament, duke vendosur se ligji nuk mund t’i japë një institucioni atë që nuk e ka dhënë Kushtetuta. Berisha u shpreh:
“Gjykata Kushtetuese hodhi në kosh të plehrave ligjin dhe amendamentet që donin të jepnin mburojë shtesë kryetarit të KLSH-së. Nuk mund të ndryshohet Kushtetuta me ligje. Është e pamundur. Dhe kjo është ajo që Edi Rama po tenton të bëjë tani me amendamentin Rama-Balluku/Lubia.”
Berisha paralajmëroi se çdo përpjekje e këtij lloji shkel jo vetëm germën dhe frymën e Kushtetutës, por edhe vendimet historike të Gjykatës Kushtetuese, duke e konsideruar rrezik të madh për rendin kushtetues dhe institucionet e vendit. Ai shtoi se kjo ka të bëjë jo vetëm me KLSH-në, por me çdo institucion kushtetues, për të cilin ligji nuk mund të ndryshojë nivelin e mbrojtjes që përcakton Kushtetuta.
“Ligji nuk mund të japë atë që Kushtetuta nuk e ka parashikuar. Kjo është një marrëzi që është rrëzuar qartë nga Gjykata Kushtetuese në vitin 2002 dhe nuk mund të përsëritet,” përfundoi Berisha, duke kërkuar që Rama të japë dorëheqjen dhe të ndalojë çdo veprim që cenon normën kushtetuese.
