Ish-kryeministri Sali Berisha deklaroi se zhvillimet në Venezuelë përbëjnë, sipas tij, një lajm pozitiv jo vetëm për popullin venezuelian, por edhe për shqiptarët.

Në një deklaratë publike, Berisha pretendoi se presidenti i Venezuelës, Nicolas Maduro, është rrëzuar nga pushteti me vendim të forcave amerikane dhe se kjo, sipas tij, shënon fundin e një regjimi diktatorial të lidhur me manipulimin e zgjedhjeve dhe trafikun e drogës.

Sipas Berishës, largimi i Maduros nga pushteti është një sinjal shprese për të gjithë popujt që, sipas tij, jetojnë nën regjime autoritare. Ai e krahasoi situatën në Venezuelë me realitetin politik në Shqipëri, duke e quajtur kryeministrin Edi Rama “klon” të Maduros dhe duke përdorur termin “Ramaduro”, një etiketim që, sipas tij, është përdorur edhe nga media ndërkombëtare.

Berisha theksoi se këto zhvillime përbëjnë një inkurajim të fortë për opozitën shqiptare që të intensifikojë përpjekjet për largimin e qeverisë aktuale, të cilën ai e akuzon për vjedhje votash, lidhje me krimin e organizuar dhe korrupsion.

Në deklaratën e tij, Berisha përmendi gjithashtu protestat në Iran, duke thënë se qytete të tëra janë përfshirë nga demonstrata kundër regjimit të ajatollahëve dhe duke shprehur shpresën që edhe ai regjim të ketë, sipas tij, të njëjtin fat si Maduro.