Kreu i Partia Demokratike e Shqipërisë, Sali Berisha, gjatë një bashkëbisedimi me qytetarët në rrjetet sociale, ka komentuar çështjen e pjesëmarrjes në proceset vendimmarrëse dhe zgjedhore brenda Partisë Demokratike.

Gjatë komunikimit të tij, Berisha theksoi se personat që sipas tij kanë bashkëpunuar me qeverinë kundër Partisë Demokratike nuk duhet të kenë të drejtë vote në proceset e brendshme të partisë, përfshirë primaret dhe çdo proces tjetër zgjedhor.

Sipas tij, kjo çështje duhet të vlerësohet nga degët lokale të PD-së, të cilat duhet të vendosin për rastet konkrete dhe për mënyrën se si do të trajtohen individët që kanë pasur qëndrime apo veprime që kanë dëmtuar partinë.

“Këtë duhet ta vlerësojnë degët e PD-së. Asnjë të drejtë vote as në primare, as në sekondare, asnjëherë, nuk kanë ata që kanë bashkëpunuar kundër PD me qeverinë”, u shpreh Berisha gjatë bashkëbisedimit.

Megjithatë, ai theksoi se demokratët që kanë mbetur mbështetës të Partisë Demokratike, pavarësisht pozicioneve apo detyrave që mund të mbajnë aktualisht, nuk duhet të përjashtohen nga e drejta e votës në strukturat e partisë.

“Natyrisht ata, të cilët, pavarësisht nga detyra ku janë, kanë qenë mbështetje e PD, nuk mund t’u mohojmë të drejtën e votës”, shtoi kreu i demokratëve.