Ish-kryeministri Sali Berisha i është drejtuar sërish Gjykatës Kushtetuese, duke sfiduar ligjshmërinë e masave shtrënguese që Prokuroria e Posaçme (SPAK) ka vendosur ndaj tij në kuadër të çështjes “Partizani”. Avokatët e tij pretendojnë se prokuroria nuk ka arritur të provojë rrezikun se Berisha mund të intimidojë dëshmitarët apo të prishë provat, siç ishte argumentuar për të mbajtur në fuqi masën e arrestit shtëpiak.

Në të njëjtën kohë, edhe dhëndri i tij, Jamarbër Malltezi, i cili ka qëndruar gati dy vite në arrest shtëpiak, i është drejtuar Kushtetueses. Më herët, kjo gjykatë ka shqyrtuar edhe ankesat e Berishës mbi masën e parë të “detyrimit për t’u paraqitur”, për të cilën ish-kryeministri pretendoi se SPAK duhej t’i ishte drejtuar Kuvendit për autorizim.

Por Kushtetuesja vendosi se deputeti nuk gëzon imunitet të veçantë në këtë rast, ndaj autorizimi parlamentar nuk ishte i nevojshëm. Megjithatë, gjykata i dha të drejtë Berishës për bllokimin e pasaportës, duke e cilësuar masën jo proporcionale.

Këtë herë, Berisha kërkon të rrëzojë vendimin e masës së detyrimit, duke argumentuar se ai nuk kishte detyrimin të paraqitej deri në hyrjen në fuqi të vendimit të 21 tetorit dhe se SPAK nuk e ka ekzekutuar vendimin në apel, ndaj nuk ka pasur shkelje nga ana e tij.

Aktualisht, Gjykata Kushtetuese nuk ka shpallur një datë për seancën plenare mbi padinë e Berishës. Në pritje është edhe kërkesa e ish-presidentit Ilir Meta, të cilit nuk iu pranua lirimi nga masa e sigurisë, pasi SPAK këmbëngul se ekziston rreziku i frikësimit të dëshmitarëve.

Ky rikthim i dy figurave të larta politike në Kushtetuese pritet të ndezë debatin mbi balancën mes luftës kundër korrupsionit dhe mbrojtjes së të drejtave kushtetuese, në një klimë politike të ndezur në prag të zgjedhjeve të vitit 2025.