Këtë të enjte do të zhvillohet mbledhja inauguruese e Bordit të Paqes, një iniciativë e presidentit amerikan Donald Trump për të dhënë fund luftës në Gaza. Takimi do të mbledhë liderë nga e gjithë bota, përfshirë edhe kryeministrin shqiptar Edi Rama.
Disa aleatë të mëdhenj europianë, përfshirë Britaninë e Madhe, Gjermaninë dhe Francën, refuzuan ftesën, duke shprehur dyshime për mënyrën e funksionimit të Bordit dhe mundësinë që ai të rivalizojë Kombet e Bashkuara. Në Bord nuk ka përfaqësim palestinez, ndërsa Izraeli mban një vend.
Trump njoftoi se anëtarët e Bordit kanë premtuar 5 miliardë dollarë për rindërtimin e Gazës, një shumë e vogël krahasuar me nevojën prej 70 miliardë dollarësh për rindërtimin e territorit të shkatërruar.
Situata në Gaza mbetet e brishtë, me Izraelin dhe Hamasin që akuzojnë njëri-tjetrin për shkelje të armëpushimit. Trupat izraelite janë tërhequr pas një të ashtuquajture “vijë e verdhë”, megjithëse ende kontrollojnë mbi gjysmën e territorit.
