Deputeti i Partisë Socialiste, Erion Braçe, ka reaguar me kritika të forta ndaj mënyrës se si po zbatohet aksioni i Administratës Tatimore për evidentimin e rasteve të mosfiskalizimit në sektorin e produkteve ushqimore, veçanërisht në zonat rurale ku prodhohet qumështi, mishi dhe bulmeti i freskët.
Në një postim në rrjetet sociale, Braçe ka denoncuar faktin që zyrtarët e shtetit po hyjnë në ambientet e prodhimit ushqimor pa respektuar rregullat bazë të higjienës, çka sipas tij, bie ndesh me vetë qëllimin e aksionit: garantimin e sigurisë ushqimore.
“A ka mundësi që zyrtarët e shtetit të mos hynë në baxhot e bulmetit dhe frigoriferët e mishit siç vijnë nga rruga? Pra pa qese në këpucë e në kokë, pa përparëse e pa doreza? Se është aksion për sigurinë e ushqimeve, jo për të kapur malin si prodhues i rigonit!”, shkruan Braçe në Facebook.
Deputeti socialist, i cili është shprehur herë pas here në mbrojtje të fermerëve dhe prodhuesve vendas, ka bërë thirrje që kontrollet të respektojnë standardet sanitare dhe të mos cënojnë produktin apo procesin e prodhimit me sjellje të pakujdesshme nga ana e inspektorëve.
Aksioni i fundit i Tatimeve synon të luftojë informalitetin në sektorin ushqimor, veçanërisht rastet kur shitësit dhe prodhuesit nuk lëshojnë faturë për shitjet që kryejnë. Por ndërhyrja në zinxhirin e prodhimit ka ngjallur reagime, jo vetëm nga fermerët, por edhe nga përfaqësues të vetë mazhorancës, si Braçe, i cili kërkon që aksioni të mos bëhet në kurriz të etikës profesionale dhe të sigurisë së konsumatorit.
