Kreu i PD-së, Sali Berisha ka komentuar buxhetin e vitit 2025, shifrat e të cilit janë bërë publik tashmë.
Sipas Berishës, ky buxhet në total prej 8.2 miliardë euro është buxheti më i madh dhe që në pamje të parë duhet të ofronte mirësinë më të madhe për qytetarët shqiptarë.
“Por, në Shqipëri ka ndodhur një fenomen paradoksal.
Rritja e përvitshme e buxhetit gjer pothuajse në dyfishimin e tij është shoëqruar në mënyrë të habitshme me rritjen e përvitshme të varfërisë.
Varfërisë relative, varfërisë të skajshme apo mjerimit.
Kjo dukuri unike është tipar kardinal i buxheteve të diktaturave ideologjike dhe mobokracive kleptokratike.
Nuk mund të ndodhë kurrë kjo përveçse në regjime ku paratë përdoren siç i përdorte diktatori Hoxha për bunkerë dhe tunele, ose siç i përdor Edi Rama për punëra publike me çmime 10 herë më të lartë se në Kroaci.
Kështu që ky buxhet, para se gjithash mund të cilësohet si buxheti i triumfit të kleptokracisë, të vjedhjes, parajsës qeveritare dhe si buxhet pa mëdyshje i ndëshkimit të qytetarëve shqiptarë.
Do më lejoni t’u zbërthej këtë deklaratë.
Së pari, në qoftë se ju merrni dhe studioni buxhetin, do të gjeni se pjesa dërrmuese e tij nuk i përkushtohet qytetarit, shërbimeve, trajtimit, pagesave ndaj tij, por është investim kapital njëlloj siç ndodhte në diktaturën ideologjike ku 35 përqind e buxhetit investohej në bunkerë dhe tunele, por këtu nuk ka bunkerë dhe tunele. Këtu investohet në rrugë, punë publike që ndërtohen me çmim të 10-fishtë”, ka thënë Berisha.
Më tej kreu i PD-së, është ndalur tek të zgjithë zërat buxhetorë, duke argumentuar secilin perj tyre.
“Të kthehemi pak çfarë mbetet nga buxheti më i madh në histori për qytetarët shqiptarë?
Për shërbimin shëndetësor, investohet gjithsej 2.5 përqind e Prodhimit të Brendshëm.
Për arsimin, 2.9, por mos harroni se shpenzimet totale janë rritur me 6.7 përqind.
Pra, shpenzimet në këto dy fusha rriten pothuajse 3 herë më pak se në fushat e tjera.
Fusha që kanë lidhje direkt me qytetarin, me shëndetin, me fëmijët e tyre.
Çfarë ndodh me rrogat?
Zero rritje rrogave në vitin 2025.
Çfarë ndodh me fermerët?
Trajtim qesharak i paimagjinueshëm.
Taksa ndëshkuese TVSH nuk ndryshon dhe lihen gjithsej 40 milionë për ata të cilët japin mbi 20 përqind të prodhimit bruto të vendit.
A mund të imagjinoni ju 40 milionë euro për ata që përbëjnë 40 përqind të popullatës së vendit dhe japini 20 përqind? Atyre u thuhet falimentoni, falimentoni, falimentoni.
Çfarë ndodh me bizneset? Sa u kalon nga ky buxhet bizneseve që janë gjeneratorët e tij? Jo vetëm që nuk ulen taksat, por rriten përsëri taksat dhe përveç tyre, parashikohen që nëpërmjet metodave arbitrare, të paguajnë edhe 500 milionë euro më tepër.
Pra, a nuk është ky një injorim total për bizneset në Shqipëri?”, është shprehur Berisha.
