Pas më shumë se dy muaj nga zhvillimi i zgjedhjeve parlamentare të 11 majit, Kreu i Komisionit Qendror të Zgjedhjeve, Ilirjan Celibashi, ka shpërndarë sot mandatet për Qarkun e Tiranës.

Sipas njoftimit zyrtar, mandatet e certifikuara deri tani i përkasin Partisë Socialiste, koalicionit PD–ASHM dhe Partisë Mundësia e Lëvizjes Bashkë. Këto janë formacionet që kanë kaluar fazën e shqyrtimit pa kontestime apo ndërlikime ligjore.

Ndërkohë, ende nuk ka një vendim për koalicionin “Nisma Shqipëria Bëhet” dhe Partinë Socialdemokrate (PSD), të udhëhequr nga Tom Doshi. Këto dy subjekte ndodhen në qendër të debatit për mandatet e vetme të fituara, për të cilat janë ngritur kërkesa ligjore dhe politike.

Brenda koalicionit Nisma Shqipëria Bëhet janë shfaqur polemika lidhur me identitetin përfitues të mandatit të vetëm, ndërsa PSD-ja ka kërkuar zyrtarisht djegien e listës së mbyllur dhe transferimin e mandatit tek lista e hapur — një kërkesë që vjen në një moment kur interpretimi i dispozitave ligjore mbi listat e kandidatëve është ende në diskutim institucional.

KQZ pritet të shprehet mbi këto çështje në ditët në vijim, ndërsa vonesat në certifikimin e plotë të mandateve po shkaktojnë tension politik dhe vonesa në nisjen zyrtare të punimeve parlamentare të legjislaturës së re.