Këshilli i Ministrave miratoi sot një sërë vendimesh dhe projekte strategjike që prekin administrimin e pasurive të paluajtshme, energjinë, bashkëpunimin ndërkombëtar dhe inovacionin në vend.
Një nga vendimet kryesore është krijimi i bazës së të dhënave shtetërore “Regjistri qendror i bazës së të dhënave të pasurive të paluajtshme (kadastra fiskale)”, një hap që synon përmirësimin e transparencës dhe menaxhimit të pronave në vend. Ky regjistër do të shërbejë si platformë qendrore për të gjithë të dhënat e pasurive të paluajtshme, duke lehtësuar proceset administrative për qytetarët dhe institucionet publike.
Po ashtu, u miratua buxheti i Agjencisë Shtetërore të Kadastrës për vitin 2026, duke siguruar fondet e nevojshme për funksionimin e këtij institucioni dhe avancimin e projekteve të digitalizimit të procesit kadastral.
Në fushën e energjisë, Këshilli i Ministrave miratoi ndërtimin e një centralit gjenerues të energjisë elektrike fotovoltaike me kapacitet të instaluar 95 MW në zonën kadastrale 3204, njësia administrative Synej, Bashkia Kavajë, Qarku Tiranë. Ky central nuk është objekt koncesioni dhe nuk përfiton nga masat mbështetëse, duke synuar përmirësimin e prodhimit të energjisë së pastër dhe diversifikimin e burimeve energjetike në vend.
Në fushën e bashkëpunimit ndërkombëtar, u miratua në parim marrëveshja e financimit ndërmjet Shqipërisë, Malit të Zi dhe Komisionit Evropian për programin IPA të bashkëpunimit ndërkufitar Mali i Zi – Shqipëri 2021-2027. Programi synon thellimin e lidhjeve rajonale dhe përmirësimin e projekteve të zhvillimit ekonomik dhe social në zonat kufitare.
Një tjetër vendim i rëndësishëm është organizimi dhe funksionimi i agjencisë “Innovation4Albania”, një person juridik publik buxhetor në varësi të ministrit përgjegjës për inovacionin, me seli në Tiranë. Agjencia do të financohet nga buxheti i shtetit, donacione dhe burime të tjera të ligjshme, duke synuar nxitjen e inovacionit dhe mbështetjen e projekteve teknologjike në vend.
Gjithashtu, u miratua organizimi dhe funksionimi i Drejtorisë së Përgjithshme të Rezervave Materiale të Shtetit (DPRMSH) si person juridik publik buxhetor, gjithashtu në varësi të ministrit përgjegjës, me seli në Tiranë. Drejtoria do të menaxhojë rezervat materiale të shtetit, duke garantuar planifikimin dhe përdorimin e tyre në mënyrë efektive dhe transparente.
