Ish-ministri i Mbrojtjes, Fatmir Mediu, ka vijuar të kundërshtojë konkluzionet e akt-ekspertimit tekniko-ushtarak të paraqitura në kuadër të hetimeve për çështjen “Gërdeci”, duke theksuar se trajtimi i municionit ishte një kompetencë ekskluzive e Forcave të Armatosura dhe jo e ministrit të Mbrojtjes.

Në një deklarim të dhënë gjatë seancës gjyqësore, Mediu argumentoi se çdo vendim i marrë në qeveri në lidhje me procesin e çmontimit të municioneve ka qenë i shoqëruar fillimisht me një urdhër ministri, i cili më pas është ndjekur nga një urdhër tjetër apo udhëzim i shefit të Shtabit të Përgjithshëm të Forcave të Armatosura.

“Kështu funksionon në Ministrinë e Mbrojtjes”, theksoi Mediu.

Duke komentuar rolin e kompanisë SAC në procesin e asgjësimit të municioneve, ai u shpreh se ajo kishte detyrime jo vetëm për demontimin, por edhe për demilitarizimin e tyre për t’i kthyer ato në materiale të paefektshme dhe të parrezikshme.

“SAC ka kryer vetëm demontimin, pa e kthyer municionin në të parrezikshëm. Ky fakt i është vënë në dukje kompanisë”, deklaroi Mediu.

Sipas ish-ministrit të Mbrojtjes, Forcat e Armatosura kishin detyrimin ligjor për të mbikëqyrur procesin.

Ai theksoi gjithashtu se zyrtarë të lartë të FA-së kanë qenë fizikisht në ambientet e Gërdecit, por nuk kanë zbatuar detyrimet që u janë ngarkuar nga vendimi i Këshillit të Ministrave.