Në raportimin e tij në Komisionin e Ligjeve, kreu i SPAK, Altin Dumani, bëri të qartë se sulmet dhe deklaratat politike ndaj strukturës që ai drejton kanë një ndikim të drejtpërdrejtë mbi rrezikun ndaj prokurorëve të posaçëm nga krimi i organizuar.
“Deklaratat politike frymëzojnë dhe elementë të krimit të organizuar. Sa herë shtohen sulmet politike, vihet re shtim i rasteve të kërcënimeve të prokurorëve të posaçëm. Ne qëndrojmë larg retorikës politike”, tha Dumani.
Ai theksoi gjithashtu se prokurorët e SPAK kanë qenë objekt i kërcënimeve serioze gjatë hetimeve për goditjen e organizatave kriminale, duke nënvizuar nevojën për respekt dhe mbrojtje të punës së tyre profesionale.
“Është e domosdoshme që prokurorët të punojnë në një ambient të sigurt, pa presion politik apo kërcënime nga krimi i organizuar,” shtoi Dumani.
Kjo deklaratë vjen në një moment kur retorika politike ndaj SPAK është intensifikuar, duke ngjallur debate mbi pavarësinë dhe sigurinë e institucionit që trajton çështjet më të ndjeshme të drejtësisë.
