Ish-kryetari i degës së PD në Durrës, Arlind Boshku, ka reaguar ashpër pas vendimit për përjashtimin e tij nga Grupi i Këshilltarëve, duke drejtuar kritika të forta ndaj drejtuesve të Partia Demokratike e Shqipërisë dhe në mënyrë të veçantë ndaj Flamur Noka.

Sipas Boshkut, vendimi i Kryesisë, i firmosur nga Noka, është i padrejtë dhe i motivuar politikisht, ndërsa arsyeja zyrtare e përjashtimit një takim me Ervin Salianji nuk qëndron.

Ai thekson se familja e tij ka kontribuar për 35 vite në radhët e partisë, duke marrë pjesë në çdo fushatë dhe betejë politike pa kërkuar përfitime personale. Megjithatë, sipas tij, këto kontribute janë shpërfillur dhe janë trajtuar si “pronë private” nga drejtuesit aktualë.

“Ndërkohë që ne mbulonim fushatat me kontributet tona, drejtues dhe kandidatë i kanë trajtuar këto sakrifica pa transparencë dhe pa përgjegjësi”, shprehet ai.

Boshku nënvizon se përjashtimi i tij vjen pasi ai dhe strukturat në Durrës kanë kërkuar reflektim për humbjet e njëpasnjëshme dhe vendosjen e rregullave të qarta për meritokracinë brenda partisë.

“Ne kemi kërkuar që anëtarët të vendosin për lidershipin dhe jo lidershipi të përzgjedhë anëtarët sipas interesit për të mbajtur peng partinë”, deklaron ai.

Në reagimin e tij, ai akuzon drejtuesit për mungesë transparence financiare dhe për kërkesa për kontribute monetare pa dokumentacion.

“Partia nuk mund të trajtohet si biznes privat dhe as si mjet për luksin e disa individëve”, shprehet ai, duke shtuar se demokratët nuk mund të mbajnë barrën e shpenzimeve të drejtuesve.

Ai kritikon gjithashtu faktin që partia vijon të mbetet në opozitë prej 13 vitesh, duke ia faturuar këtë drejtimit aktual.

Në përfundim, Boshku thekson se përjashtimi nuk e largon atë nga partia, të cilën e konsideron si pronë të demokratëve dhe jo të një grupi të vogël drejtuesish.

“Partia është e demokratëve, jo e një grupi që kërkon ta mbajë të uzurpuar”, përfundon ai.