“E mbani mend kur u turrën te i ndjeri Klodian Rrasha që vajti kryeministri me Ulsi Manjën i dërguan edhe çek. Ja blenë gjakun me para dhe e detyruan të atin të bëjë thirrje rinisë që të mos protestojnë dhe ta politizojnë. Kur e shet i ati gjakun të tjerët nuk kanë çfarë bëjnë se unë ndihem i turpëruar se ai është dhe dibran”.

Kjo deklaratë e bërë dy javë më parë nga Shemsi Prençi ka sjellë reagimin e fortë të së atit të Klodian Rashës.

I ftuar në emisionin “People” në Euronews Albania, i ati i të ndjerit Klodian Rasha i është përgjigjur “dhëmb për dhëmb” Prençit i cili e akuzoi se ka shitur gjakun e të birit.

I ati i të riut me një revoltë dhe zemërim nga kjo akuzë e Prençit u shpreh se askush nuk mund të përgojojë familjen e tij. Duke theksuar se nuk ka marrë asnjë cent nga askush, Qazim Rasha tha se si dibran që është ka pranuar për ngushëllim në banesën e tij të gjithë ata që trokitën, duke shtuar më tej se e vetmja gjë që i ka kërkuar kryeministrit Rama ka qenë drejtësi për të birin.

“Dua që ti shpreh mirënjohje familjes së 14 vjeçarit sepse vetëm një prind si puna ime e di çfarë do të thotë fëmija, familja edhe i shpreh ngushëllime. Kjo intervistë e imponuar nga ngacmimi që më ka bërë sot Shemsi Prenci. Me të gjithë konsideratën që kam si njeri, edhe pse s’jemi takuar, kam gëzuar respekt për një njeri që ka vlerë por të arrijë një personalitet një figurë e njohur, aq më tepër një dibran që e njeh mirë traditën e një dibrani të përgojojë mua dhe familjen time apo të ngrejë alibi të asaj kategori që ka ngritur nuk ja fal kurrë, jo vetëm atij por asnjë specie në botë. Nuk është dëgjuar që një prind të diskutojë dhe të vërë në pazare çështjen e fëmijës së vet.

Mua më ka ndodhur tragjedia. Unë kam pritur në shtëpi, presidentin, kryeministrin anëtarë të opozitës e të gjithë me radhë. U kam shprehur mirënjohjen të gjithëve, iu kam shprehur mirënjohje si dibran, tradita jonë e do që hasmit ti hapëm derën si në të mirë si në të keq dhe u japim atë që i takon. I kam pritur dhe i kam përcjellë të gjithë ata që kanë ardhur të pinë një kafe për ngushëllim. I kam kërkuar kryeministrit siç jam unë për familjen time, kërkoj drejtësi nëse ma jep mua më lehtëson jo se më heq dhimbjen.

I kam kërkuar që ditën e parë. Jo se i kam kërkuar që të ndalojnë protestat. Se jam gati të protestoj për të gjithë që kanë dhimbje të tilla. Gjithë këto alibi që krijohen janë inskenime dhe nuk e di ku e kanë qëllimin, por janë kaq të ulëta, vetëm një njeri i ulët mund ta imagjinojë dhe të më përmendë mua shitjen e gjakut të djalit dhe çekun. Format si i kam pritur i di unë, si jap llogari kujt. Të faktojë ai nëse unë kam marrë qoftë dhe një cent të tjetër, dhe pranoj unë të varem në mes të sheshit. Ky është një gjest shumë i ulët”, tha Qazim Rasha.