Kryeministrja daneze, Mette Frederiksen, deklaroi se synimi i presidentit amerikan, Donald Trump, për të blerë Groenlanda mbetet ende aktual, pavarësisht uljes së tensioneve në periudhën e fundit.
“Fatkeqësisht, mendoj se dëshira e tij mbetet e njëjtë,” tha ajo, duke iu përgjigjur pyetjes nëse presidenti amerikan vazhdon të kërkojë që Groenlanda të bëhet pjesë e territorit të Shteteve të Bashkuara. “Të gjithë na pyesin nëse mendojmë se ka mbaruar. Jo, nuk mendojmë se kjo krizë ka mbaruar,” shtoi Frederiksen.
Kryeministrja daneze dhe homologu i saj në Groenlandë, Jens Frederik Nielsen, theksuan se presioni amerikan është i papranueshëm. Sipas Frederiksen, është ngritur një grup pune për të shqyrtuar situatën dhe për të gjetur zgjidhje të mundshme, por ajo nënvizoi se ekzistojnë “vija të kuqe” që nuk mund të kalohen.
E pyetur nëse ekziston një shumë parash për të cilën Kopenhagen do të ishte i gatshëm t’ia shiste Groenlandën Washington, D.C., Frederiksen u përgjigj se territori nuk është në shitje.
“Sigurisht që jo. A do t’i vinit një çmim një pjese të Spanjës apo SHBA-së? Ne duhet të mbrojmë shtetet-kombe dhe të drejtën e popujve për vetëvendosje. Populli i Groenlandës e ka thënë qartë se nuk dëshiron të bëhet amerikan,” u shpreh ajo.
