Aeroporti i Mynihut në Gjermani u detyrua të mbyllej të enjten në mbrëmje, pasi disa dronë të paidentifikuar u panë duke fluturuar pranë hapësirës së tij ajrore.

Sipas autoriteteve, të paktën 17 fluturime u anuluan, duke prekur rreth 3,000 pasagjerë, ndërsa disa avionë të tjerë u devijuan drejt qyteteve më të afërta.

Zëdhënësi i Policisë Federale, Stefan Bayer, tha për Bild se për shkak të errësirës nuk ka ende të dhëna për llojin, madhësinë apo origjinën e dronëve. Ato u raportuan për herë të parë në orën 21:30 dhe më pas përsëri një orë më vonë.

Ky incident vjen në një kohë kur një valë dronësh të paidentifikuar ka shkaktuar mbyllje të aeroporteve të ndryshme në Evropë. Këtë javë, edhe aeroportet e Kopenhagenit dhe Oslos u detyruan të ndërprisnin fluturimet për arsye sigurie.

Tensionet janë rritur pas raportimeve se 20 dronë rusë kanë hyrë në hapësirën ajrore të Polonisë dhe avionë luftarakë MiG-31 kanë shkelur hapësirën ajrore të Estonisë. Megjithatë, autoritetet daneze theksojnë se nuk ka prova për përfshirjen e Moskës, ndërsa Rusia i ka mohuar akuzat.

Pamjet e fundit të dronëve në hapësirën ajrore evropiane ishin gjithashtu temë diskutimi në një samit të liderëve në Kopenhagen këtë javë.