Anëtari i Kryesisë së FRPD-së, Orest Berberi, ka akuzuar qeverinë dhe bashkinë e Durrësit për shpronësime të padrejta dhe abuzive në kuadër të projektit TID. Në një deklaratë nga selia e PD-së, Berberi u shpreh se qytetarët po dëmtohen, ndërsa “klientët e pushtetit shpëtojnë dhe ndërtojnë kulla”.
“Qytetarëve të thjeshtë u prishet prona, ndërsa për individët e fortë të mazhorancës ngërçet ligjore shpëtojnë pronat e tyre nga shembja”, tha Berberi.
Akuzat e FRPD
Sipas tij, procesi i shpronësimeve është i padrejtë dhe shoqërohet me një sërë shkeljesh:
Qytetarëve po u ofrohen çmime dyfish më të ulëta se tregu, çka ai e cilësoi si “grabitje me firmë dhe vulë shteti”.
Procesi po kryhet pa njoftime zyrtare, duke lënë banorët pa transparencë dhe pa mundësi mbrojtjeje ligjore.
Shpronësimet kryhen në mënyrë selektive, duke u favorizuar individë të lidhur me mazhorancën.
“Ndërkohë që qytetarëve u shkatërrohen pronat në emër të trashëgimisë kulturore, vetëm pak metra më tutje ngrihen kulla shumëkatëshe të betonit”, shtoi Berberi.
FRPD fajëson drejtpërdrejt Kryeministrin Edi Rama si ideator dhe përfitues të projektit. “Edi Rama po shet Durrësin tek klientët e tij”, u shpreh Berberi, duke e cilësuar kryetaren e bashkisë Emiriana Sako si “zbatuesen lokale të urdhrave që po shkatërrojnë qytetin”.
Kërkesat e FRPD
Orest Berberi kërkoi nga qeveria dhe bashkia:
Ndërprerjen e menjëhershme të procesit të shpronësimeve;
Rishikimin e vlerave sipas tregut real;
Transparencë të plotë mbi çdo vendim;
Ndalimin e klientelizmit dhe selektivitetit në proces.
“Durrësi nuk është pronë e Edi Ramës dhe as e Emiriana Sakos. Durrësi është i qytetarëve të tij dhe ne nuk do të lejojmë që të shitet për interesa private”, përfundoi Berberi.
