Gazment Bardhi është shprehur kundër idesë që kryetari i Partisë Demokratike të largohet automatikisht nga detyra nëse humb zgjedhjet, duke e konsideruar të ashtuquajturin “nen Basha” si një dispozitë antidemokratike. Në një intervistë për emisionin “Log.” në News24, Bardhi tha se largimi nga drejtimi i partisë duhet të jetë një akt vullneti personal, jo një detyrim i imponuar nga statuti.
“Nuk mund të ketë 1500 delegatë që mbivendosin vullnetin e 40 mijë anëtarëve të PD. Çdo individ ka të drejtën për t’u zgjedhur dhe për të kërkuar votëbesim”, u shpreh Bardhi, duke shtuar se një kryetar që ndjen mbështetjen e shumicës së anëtarësisë duhet të ketë të drejtë të rikandidojë.
Bardhi theksoi se në vend që të fokusohet debati te largimi i individëve, vëmendja duhet të përqendrohet te “farsa zgjedhore” e vitit 2025, që sipas tij nuk garantoi zgjedhje të lira dhe të ndershme.
Ai shtoi se aktualisht nuk ka ambicie për të qenë kryetar i PD, por nuk përjashtoi një mundësi të tillë në të ardhmen: “Mund ta kem pas 10 vitesh, nuk e përjashtoj.”
I pyetur për praninë e deputetes së re të PS-së, Zegjine Çaushi, në Kuvend, Bardhi u tregua ironik duke thënë se nuk i druhet përballjes me të dhe e akuzoi për shpërdorim të fondeve publike në kohën kur punonte në bashki.
Deklaratat e Bardhit vijnë në një moment kur PD ndodhet në një fazë të brendshme reflektimi dhe përçarjeje, ndërsa debati për lidershipin mbetet i hapur.
