Për 3 nga 4 vitet e mandatit të Qeverisë Kurti II, vetëm 1.6 kilometra rrugë të reja u ndërtuan.
Për këto vite (2021, 2022 dhe 2023) në Qeveri, përveç mirëmbajtjes së rrugëve ekzistuese apo zgjerimit eventual të ndonjë rruge tjetër që kryesisht kanë filluar nga qeveritë e kaluara, por që janë vonuar për shkak të proceseve gjyqësore që ndërlidhen me kompensimin, kryeministri Albin Kurti nuk ka bërë asgjë për zhvillimin e infrastrukturës rrugore të Republikën e Kosovës.
Në asnjë qytet dhe në asnjë fshat të Kosovës nuk është ndërtuar ndonjë rrugë e re. Kilometrat e rrugëve të reja nuk kanë lëvizur që nga viti kur Kurti hyri në ndërtesën e Qeverisë së Kosovës si kryeministër, shkruan Demokracia.com.
Sipas të dhënave zyrtare të Agjencisë së Statistikave të Kosovës, e cila është nën varësinë e drejtpërdrejtë të kryeministërit Kurti, shifrat që tregojnë gjatësinë e rrugëve të Kosovës nuk kanë lëvizur në katër vitet e fundit. Për vitin 2024 do të publikohen nga ASK në vitin 2025 dhe duhet të theksohet se në këtë vit ndryshojnë të dhënat, pasi që janë duke u shtruar dhe ndërtuar disa rrugë nacionale.
Sipas vjetarit statistikor të ASK-së për vitin 2024, ku përfshihen të dhënat deri më 31 dhjetor 2023, në vitin 2020 “gjatësia e rrugëve ishte 2,432.4 kilometra” dhe pak ka ndryshuar në vitin 2023. “Gjatësia e rrugëve në vitin 2023 ishte 2,434.0 kilometra”, thuhet në dokumentin e ASK-së, përcjell Demokracia.com.
Po sipas këtij dokumenti zyrtar, ecuria e ndërtimit të rrugëve të reja ishte e përvitshme, por që ndaloi me ardhjen e Kurtit në Qeveri.
“Gjatësia e rrugëve në vitin 2014 ishte 2,005.5 km”, thuhet në këtë dokument, ku tregohet se në vitin 2015 ky numër kishte shkuar në 2,012.0 km, në vitin 2016 në 2,032.0 km, në vitin 2017 në 2,043.4 km, në vitin 2018 në 2,074.7 km, në vitin 2019 në 2,311,7 km dhe në vitin 2020 në 2,432.4 km.
Sali Berisha ka shpërndarë një poster propagandues të Albin Kurtit kundër Edi Ramës, një material i shpërndarë nga militantë të Kurtit, ku thuhet se Albin Kurti ka ndërtuar 42 kilometra rrugë me 7.9 milionë euro, ndërsa Edi Rama ka ndërtuar 43 kilometra rrugë me 400 milionë euro.
