Deputeti i Partisë Demokratike, Samir Korreshi, ka ironizuar gjatë mbledhjes së Komisionit të Ligjeve, duke komentuar mungesën e kryeministrit Edi Rama në mbledhjet e këtij komisioni.
Korreshi, me tone humoristike, u shpreh se kryeministri nuk është paraqitur ndonjëherë në Komisionin e Ligjeve dhe se, sipas tij, tashmë “i ka marrë malli” për të.
“Ore, meqë na ka marrë malli për atë kryeministrin, nuk e kemi parë ndonjëherë, ta puthim se na mori malli o burrë i dheut”, – tha Korreshi, duke iu drejtuar kryetarit të Komisionit dhe ish-ministrit të Drejtësisë, Ulsi Manja.
Në përgjigje, Manja reagoi me një batutë, duke e marrë me sportivitet ironinë e deputetit demokrat.
“Ju lutem, se edhe po erdhi ai, ti nuk e mbërrin dot”, – iu përgjigj Manja, mes të qeshurash në sallë.
Shkëmbimi i batutave mes dy deputetëve solli një moment humori gjatë diskutimeve në Komisionin e Ligjeve, i cili zakonisht karakterizohet nga debate të ashpra politike.
