Ish-kryeministri Sali Berisha ka lëshuar një sërë akuzash të forta ndaj gjyqtares së GJKKO-së, Irena Gjoka, dhe prokurorit Altin Dumani, duke i akuzuar për abuzim me drejtësinë dhe mbrojtje të interesave politike.
Në një deklaratë publike, Berisha pretendoi se prokurori Altin Dumani ka hapur një çështje penale kundër tij, pa përmendur emrin e personit që ai e cilëson si paditës, duke aluduar se bëhet fjalë për Irena Gjoken. Sipas tij, kjo përbën një “krim procedural” dhe është një përpjekje për të mbrojtur një figurë që, sipas tij, “nuk e meriton të jetë në sistemin e drejtësisë”.
“Irena me tre apo pesë mbiemra është një delinkuente që duhet të largohet menjëherë nga drejtësia. Ka mashtruar në deklarimet e pasurisë dhe në formularët e dekriminalizimit,” u shpreh Berisha, duke përmendur një dënim të supozuar nga një gjykatë greke, që sipas tij është fshehur nga vetë gjyqtarja.
Ai akuzoi gjithashtu Gjoken për falsifikim dokumentesh, duke pretenduar se një kontratë borxhi prej 60 milionë lekësh është bazuar në një referencë të Kodit Civil të vitit 2015, ndërkohë që dokumenti i pretenduar daton që në vitin 1996.
“Irena Dumani i ka marrë 60 milionë lekë borxh një gruaje që i kishte marrë më parë burrin. Njëherë i merr burrin, pastaj edhe lekët. Edhe në rrafsh moral është një skandal,” tha Berisha.
Sipas ish-kryeministrit, Gjoka ka firmosur prokurë për një çështje në Greqi, çka tregon sipas tij për vetëdijen e saj për dënimin atje, ndonëse, siç pohon Berisha, ajo e ka mohuar publikisht ndonjë dënim penal në dokumentet e vetingut.
Duke e konsideruar Dumanin si “fytyrën e vërtetë të deformimit të sistemit të drejtësisë”, Berisha akuzoi edhe prokurorin se “nuk ka guximin” të regjistrojë çështjen penale me emër konkret, por po e shtyn për të mbrojtur atë që ai e quan “llumi i reformës”.
“Ky është sistemi i drejtësisë që na u premtua si reformë. Në fakt, është kthyer në një mjet për mbrojtjen e të paaftëve, të rrezikshmëve dhe të korruptuarve,” deklaroi ai.
Deklaratat e Berishës vijnë në një kohë kur ai vetë është nën hetim nga SPAK për çështje të ndryshme dhe ndodhet në masë sigurie “arrest në shtëpi”. Akuzat e tij për përfshirje politike dhe mungesë integriteti në sistemin e drejtësisë kanë qenë të vazhdueshme.
Deri më tani, gjyqtarja Irena Gjoka dhe prokurori Altin Dumani nuk kanë reaguar publikisht ndaj këtyre akuzave.
