Guvernatori i Bankës së Shqipërisë, Gent Sejko, njoftoi se të gjitha bankat shqiptare janë pranuar për t’u bërë pjesë e sistemit SEPA, duke bërë të mundur kryerjen e pagesave dhe transferta në standardet e Bashkimit Europian. Sistemi do të bëhet funksional më 7 tetor, sipas Sejkos.
Ai theksoi se ky është një hap i madh për Shqipërinë, pasi jo vetëm që kursen para për ekonominë nga ulja e komisioneve, që do të jenë rreth pesë herë më të ulëta, por edhe përmirëson imazhin ndërkombëtar të vendit dhe tërheq investime të huaja.
Sejko shtoi se kjo arritje konsiderohet një integrim i rëndësishëm i Shqipërisë në Bashkimin Europian në fushën e pagesave financiare. Ai vuri në dukje se ekonomia e vendit po rritet dhe pritet që në afatin e shkurtër dhe mesëm rritja të vazhdojë me ritme 3.5-4%, me sektorin e turizmit si një nga motorët kryesorë.
Guvernatori nënvizoi gjithashtu se ky hap është rezultat i përgatitjeve të kujdesshme nga bankat dhe Komisioni Europian i pagesave, që certifikon dhe ndjek procesin e integrimit në SEPA.
