Kuvendi i Shqipërisë do të ketë një drejtim të ri në legjislaturën e ardhshme. Kryetarja aktuale, Elisa Spiropali, pritet të largohet nga posti për të marrë drejtimin e Ministrisë së Jashtme, ndërsa në karrigen më të lartë të Parlamentit do të ngjitet ish-zëvendëskryeministri dhe ish-ministri i Mbrojtjes, Niko Peleshi.
Një tjetër ndryshim vjen edhe në postin e nënkryetarit të Kuvendit, ku Bledi Çuçi i lë vendin deputetes së Durrësit, Klodiana Spahiu.
Në krye të Grupit Parlamentar Socialist rikthehet Taulant Balla, pas disa vitesh në qeveri si ministër i Brendshëm dhe më pas ministër i Shtetit për Marrëdhëniet me Parlamentin. Ai do të zëvendësojë Niko Peleshin, që tashmë merr drejtimin e Kuvendit.
Edhe drejtimi i komisioneve parlamentare pëson lëvizje. Tre ministra të kabinetit të mëparshëm do të kenë rol aktiv në këtë strukturë:
Ulsi Manja rikthehet në krye të Komisionit të Ligjeve,
Igli Hasani, aktualisht ministër i Jashtëm, do të drejtojë Komisionin për Punët e Jashtme,
Arbian Mazniku do të drejtojë komisionin për reformën administrative-territoriale.
Drejtuesit e rinj
Kryetar i Kuvendit: Niko Peleshi (në vend të Elisa Spiropalit)
Nënkryetare e Kuvendit: Klodiana Spahiu (në vend të Bledi Çuçit)
Kryetar i Grupit PS: Taulant Balla (në vend të Niko Peleshit)
Komisioni i Ligjeve: Ulsi Manja (në vend të Klotilda Bushkës)
Komisioni i Jashtëm: Igli Hasani (në vend të Mimi Kodhelit)
Struktura e re e komisioneve
Legjislatura e re do të nisë me një ristrukturim të rëndësishëm. Nga 8 komisione të përhershme, numri rritet në 11. Prej tyre, 7 do të drejtohen nga mazhoranca dhe 4 nga opozita.
Komisioni për Ekonominë, Punësimin dhe Financat – PS
Komisioni për Çështjet Ligjore dhe Administratën Publike – PS
Komisioni për Çështjet e Brendshme dhe Mbrojtjen – PS
Komisioni për Edukimin, Shkencën dhe Sportet – Opozita
Komisioni për Shëndetësinë dhe Mirëqenien Sociale – Opozita
Komisioni për Burimet Natyrore, Infrastrukturën dhe Zhvillimin e Qëndrueshëm – PS
Komisioni për të Drejtat e Njeriut dhe Mjetet e Informimit Publik – Opozita
Komisioni për Bujqësinë, Ushqimin dhe Zhvillimin Rural – PS
Komisioni për Kulturën, Turizmin dhe Diasporën – Opozita
Komisioni për Europën dhe Punët e Jashtme – PS
Komisioni për Nismat Qytetare, Bashkëpunimin dhe Mbikëqyrjen Institucionale – PS
Me këto ndryshime, Partia Socialiste konsolidon drejtimin e saj në legjislaturën e re, duke shpërndarë role kyçe ndërmjet figurave me eksperiencë të gjatë qeverisëse dhe deputetëve të rinj në skenën politike.
