Ish-shefi i qarkullimit rrugor, Roven Zeka, ka paraqitur një kërkesë për ndryshim të masës së sigurisë, pas një incidenti të ndodhur brenda ambienteve të burgut. Zeka është rrëzuar në qeli dhe ka pësuar një dëmtim serioz në pjesën e legenit, çka ka shtyrë mbrojtjen e tij të kërkojë lirim ose zëvendësim të masës me një më të butë.
Kërkesa është dorëzuar në Gjykatën e Shkallës së Parë për Korrupsion dhe Krim të Organizuar, dhe seanca për shqyrtimin e saj është caktuar për ditën e sotme në orën 13:00.
Zeka ndodhet në burg si i dyshuar në një hetim të drejtuar nga SPAK, ku akuzohet se ka marrë ryshfet për të favorizuar një shtetase të përfshirë në një aksident rrugor me 5 persona të plagosur lehtë.
Më herët, masa “arrest në burg” ndaj tij dhe kolegut të tij Edison Tabaku është lënë në fuqi nga Apeli i GJKKO-së. Ndërkohë, shefi i hetimit të aksidenteve, Sokol Novaku, u lirua në arrest shtëpie për shkak të rrethanave të tij familjare.
Nëse kërkesa e sotme e Zekës do të pranohet, mbetet për t’u parë nga trupa gjyqësore, ndërsa gjendja e tij shëndetësore do të jetë element kyç në vendimmarrje.
