Izraeli ka hedhur poshtë një armëpushim pesëvjeçar të propozuar me Hamasin, duke pretenduar se një armëpushim afatgjatë do t’i lejonte grupit palestinez të riarmatoset, sipas raporteve të shumta të medias që citojnë zyrtarë izraelitë.

Egjipti dhe Katari janë përpjekur të ndërmjetësojnë një armëpushim në Gaza. Izraeli e theu armëpushimin e mëparshëm dy-mujor në mars duke nisur një breshëri të re sulmesh ndaj enklavës.

Marrëveshja e re e propozuar thuhet se përfshinte lirimin e të gjithë pengjeve izraelite të mbetura që mbaheshin në Gaza në këmbim të një ndërprerjeje afatgjatë të armiqësive. Thuhet se Hamasi ka refuzuar të dorëzojë armët për aq kohë sa vazhdon pushtimi izraelit.

“Nuk ka asnjë shans që ne të biem dakord për një armëpushim të zgjatur me Hamasin që i lejon atij vetëm të riarmatoset, të rimëkëmbet dhe të vazhdojë luftën e tij kundër Izraelit”, tha zyrtari, siç citohet nga The Times of Israel.

Izraeli ka deklaruar se qëllimi i tij kryesor është çarmatimi i plotë dhe eliminimi i Hamasit.

Karta themeluese e Hamasit bën thirrje për shkatërrimin e Izraelit, por lëvizja ka sinjalizuar se mund të bjerë dakord për një armëpushim afatgjatë në këmbim të përfundimit të pushtimit, vuri në dukje Reuters. Më herët këtë muaj, grupi palestinez tha gjithashtu se dëshironte një marrëveshje gjithëpërfshirëse paqeje dhe se nuk do të pranonte asnjë marrëveshje “të pjesshme” .

Në përgjigje të refuzimit të raportuar të Izraelit për të pranuar armëpushimin afatgjatë, një grup që përfaqëson familjet e pengjeve deklaroi se “edhe një herë ‘burimi i lartë politik’ vërteton se qeveria izraelite nuk ka plan’ për lirimin e atyre që janë ende në robëri në Gaza.

Autoritetet izraelite kanë raportuar se nga 59 pengjet e listuara si pengje të mbetura në enklavë, vetëm 24 mendohet se kanë mbijetuar. Dhjetëra të tjerë janë liruar më parë nëpërmjet marrëveshjeve të armëpushimit ose marrëveshjeve të veçanta.