Gjykata e Posaçme e Shkallës së Parë për Korrupsionin dhe Krimin e Organizuar ka dhënë sot vendimin për çështjen penale nr. 17/2024, ku të pandehur janë Endri Ngresi, Ardjan Kumanaku dhe Afërdita Vidhi. Ata u gjykuan për vepra që lidhen me korrupsionin në funksione publike.
Sipas vendimit nr. 54, datë 30.07.2025, trupa gjykuese e përbërë nga gjyqtarët Flojera Davidhi, Erjon Bani dhe Erjon Çela vendosi:
Endri Ngresi u shpall fajtor për veprën penale “Korrupsioni pasiv i personave që ushtrojnë funksione publike” dhe u dënua me 3 vite burg. Gjykata vendosi gjithashtu heqjen e së drejtës për të ushtruar funksione publike për 5 vite.
Ardjan Kumanaku u shpall fajtor për “Korrupsion aktiv ndaj personave që ushtrojnë funksione publike”, në bashkëpunim, dhe u dënua me 1 vit burg.
Afërdita Vidhi u shpall fajtore për të njëjtën vepër si Kumanaku, por u përjashtua nga dënimi, në zbatim të nenit 52/a të Kodit Penal.
Gjykata urdhëroi gjithashtu që telefoni celular i sekuestruar gjatë hetimit t’u rikthehet përdoruesve të tij, Afërdita Vidhi dhe një shtetasi tjetër me inicialet K.V.
Të tre të pandehurit do të përballen gjithashtu me shpenzimet e procedurës hetimore dhe gjyqësore, të cilat u ngarkohen në mënyrë solidare.
Vendimi mund të ankimohet në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga dita e komunikimit të tij.
