Gjatë seancës së Komisionit për Ekonominë, Punësimin dhe Financat, deputeti i PS-së, Erion Braçe, nuk i kurseu kritikat ndaj zv/ministrit të Financave, Endrit Gjyzeiraj, për çështjen e kompensimit të bujqve.

Braçe i kërkoi llogari zv/ministrit pse fermerët që shesin prodhimin e tyre vetë dhe nuk e dorëzojnë te pikat grumbulluese nuk përfitojnë kompensim, duke theksuar se kjo ka goditur drejtpërsëdrejti sektorin e bujqësisë.

“Ky qëndrim refraktar që nga viti 2018 e deri tani ka sjellë situatën që kemi sot në bujqësi, me rënie dhe ndikim minimal. Ky qëndrim më shtyn të besoj se Ministria e Financave ka qëllim të ndryshojë strukturën e ekonomisë duke goditur sektorë me funksion të gjerë si bujqësia,” tha Braçe.

Deputeti shtoi se propozimet profesionale duhet të merren parasysh dhe kritikoi qeverinë për ligjin që nuk lejon kompensimin e atyre që shesin direkt në tregjet bujqësore: “Kush jeni ju që thoni se nuk merr kompensim ai që shet vetë në treg? Ky është problem shumë i madh që duhet të diskutohet jo vetëm në komision, por edhe në sallën e Kuvendit.”