Kreu i Partisë “Shqipëria Bëhet”, Adriatik Lapaj, ka njoftuar mbajtjen e një proteste masive më 20 dhjetor, në orën 12:00, në Bulevardin “Dëshmorët e Kombit” në Tiranë. Lapaj bëri të ditur ftesën për protestë përmes një postimi në faqen e tij në Facebook, ku kërkoi dorëheqjen e Kryeministrit Edi Rama.

“Edi Rama, jep dorëheqjen! Koha jote ka mbaruar,” shkruan Lapaj në postimin e tij. Kjo protestë vjen pas një periudhe tensioni, pasi që nga 8 dhjetori, Lapaj dhe aktivistë të “Shqipëria Bëhet” janë në protestë para Kryeministrisë. Gjatë këtyre ditëve, ka pasur përplasje me forcat e policisë.

Sipas Lapajt, protesta është organizuar në mbrojtje të Kushtetutës dhe drejtësisë, duke theksuar se Kryeministri Edi Rama po i bën “kërcënime” sistemit të drejtësisë dhe institucioneve ligjore të vendit. Në këtë kontekst, Lapaj akuzon Ramën për përpjekje për të minuar funksionimin e institucioneve të pavarura dhe për t’i dhënë një goditje Kushtetutës.

Ndërkohë, protestuesit pritet të mbledhen në Bulevardin “Dëshmorët e Kombit” për të kërkuar largimin e Kryeministrit dhe për të denoncuar, sipas tyre, përpjekjet për të minuar integritetin e institucioneve të shtetit.