Marta Kos, Komisionerja e Zgjerimit të Bashkimi Evropian, po përballet me akuza të reja se ka bashkëpunuar me agjencinë sekrete të Jugosllavisë në vitet 1980, pasi një eurodeputete sllovene pretendoi se dispononte prova të reja.
Akuzat u rikthyen në vëmendje përpara zgjedhjeve parlamentare në Slloveni më 22 mars, dhe dolën gjatë një seance dëgjimore në Parlamentin Evropian për konfirmimin e Kos si komisionere në vitin 2024. Komisionerja i ka mohuar më parë akuzat.
Romana Tomc, nënkryetare e Partisë Popullore Evropiane (PPE), i tha POLITICO-s se i kishte dërguar një letër Komisionit duke kërkuar hetim mbi supozimet për bashkëpunimin e Kos me shërbimet sekrete jugosllave, duke thënë se “Kos nuk ishte e ndershme kur pretendoi se nuk bashkëpunoi me shërbimin sekret”.
Një zëdhënës i PPE-së deklaroi se grupi do ta shqyrtojë çështjen me kujdes dhe se “topi tani është në fushën e saj”. Ndërkohë, Kos nuk ka komentuar drejtpërdrejt për akuzat, por një zyrtar i Komisionit tha se ajo ka kaluar procesin e plotë të verifikimit dhe emërimi i saj u miratua nga Parlamenti si për të gjithë 27 komisionerët e BE-së.
Një burim pranë zyrës së Kos tha se ajo është e vetëdijshme se këto akuza mund të përdoren politikisht për zgjedhjet sllovene, por mbetet e fokusuar në detyrën e saj si komisionere për Zgjerimin.
Kos pritet të paraqitet të hënën para komisionit të punëve të jashtme të Parlamentit Evropian për të diskutuar zgjerimin dhe mund të përballet me pyetje për akuzat. Një ditë më pas, Romana Tomc prezantoi para Parlamentit në Strasburg një libër të autorit slloven Igor Omerza, që sipas saj përmban dokumente që vërtetojnë bashkëpunimin e Kos me agjencinë jugosllave të spiunazhit.
Zgjedhjet në Slloveni këtë muaj do të përballin koalicionin qeverisës majtë-liberal, të cilit Kos i përkiste më parë, me Partinë Demokratike Sllovene të krahut të djathtë, të cilës i përket Tomc dhe që aktualisht kryeson në sondazhe.
