Kancelari gjerman, Friedrich Merz, iu bashkua thirrjeve të partive të tij dhe politikanëve të CDU/CSU për të reduktuar fluksin e të rinjve ukrainas që arrijnë në Gjermani. Ai deklaroi se gjatë një bisede telefonike me presidentin ukrainas, Volodymyr Zelensky, ka kërkuar që të rinjtë të qëndrojnë në Ukrainë për të ndihmuar vendin e tyre në luftën kundër Rusisë.

Kryeministri bavarez dhe kreu i CSU-së, Markus Söder, ishte një nga politikanët e parë që bëri një thirrje të ngjashme, duke kërkuar nga BE dhe qeveria gjermane të ushtrojnë presion mbi Kievin për të kontrolluar dhe ulur fluksin e të rinjve.

Sipas statistikave zyrtare, numri i mbërritjeve javore të të rinjve nga 18 deri në 22 vjeç ka shkuar nga 19 në mesin e gushtit në 1.800 në fund të tetorit. Aktualisht, në Gjermani jetojnë mbi 1.2 milion refugjatë ukrainas.

Ekspertët shpjegojnë se shqetësimi i kancelarit Merz ka dy aspekte: nga njëra anë, Ukraina ka nevojë për të rinjtë në vend për të ndihmuar në luftë, dhe nga ana tjetër, qeveria gjermane tenton të kufizojë fluksin e emigracionit, duke përmbushur premtimet e bëra gjatë fushatës.