Kreu i Partisë së Lirisë, Ilir Meta, ka publikuar disa dokumente që sipas tij hedhin dritë mbi marrëveshjen mes kompanisë DIA dhe CEZ Shpërndarje, për mbledhjen e detyrimeve të papaguara në Shqipëri.

Meta pretendon se kompania DIA ka qenë “një krijesë amerikane” e lidhur me interesa të huaja që para krijimit dhe deri në mbylljen e saj, ndërsa thekson se procesi është mbështetur nga një rrjet kompanish dhe individësh të lidhur me të.

Sipas deklarimeve të tij, Sekretari i Përgjithshëm i Partisë së Lirisë, Tedi Blushi, ka bërë publike vetëm një pjesë të dokumenteve që sipas opozitës provojnë këto lidhje, ndërsa pjesa tjetër vijon të mbahet në dosje.

Meta nga burgu ka deklaruar se marrëveshja CEZ–DIA është mundësuar përmes lidhjeve mes palëve dhe garancive të ofruara nga kompania mëmë e DIA-s, Debt Advisory International LLC, ku sipas tij aksionerët kanë qenë shtetas amerikanë.

Ai ka përmendur gjithashtu një marrëveshje të supozuar mes Kastriot Ismailajt, Rebecca Gaskin dhe kryeministrit Edi Rama, duke pretenduar se janë ndarë apo kanë ndikuar mbi një shumë prej rreth 479 milionë eurosh që, sipas tij, i takonin qytetarëve shqiptarë.

Në deklaratat e tij, Meta akuzon gjithashtu se kallëzimi i Kontrollit të Lartë të Shtetit për këtë çështje nuk është trajtuar nga prokuroria, duke ngritur pretendime për një marrëveshje të mundshme mes palëve të përfshira.

Çështja CEZ–DIA mbetet një nga dosjet më të debatueshme politike dhe ligjore në vend, ndërsa deklaratat e Metës pritet të sjellin reagime të tjera në vijim.