Në pesë muajt e parë të këtij viti, Kuvendi i Shqipërisë ka shpenzuar mbi 2.2 milionë euro për pagat dhe përfitimet e 140 deputetëve të tij. Kjo shumë përfshin pagat bazë, por edhe një sërë rimbursimesh dhe dietash që lidhen me detyrën parlamentare.
Sipas gazetares Arestina Skënderi në emisionin “Dita Jonë”, shpenzimet kryesore të deputetëve përfshijnë karburantin, shpenzimet telefonike, dietat për udhëtime brenda vendit, si dhe qiratë për deputetët që nuk kanë banesë në Tiranë.
Paga bazë mujore e një deputeti pas rritjes së majit 2023 është 310,000 lekë (rreth 3,100 euro). Përveç kësaj, deputetët përfitojnë mesatarisht edhe rreth 1,500 euro në muaj nga rimbursimet e ndryshme.
Shpenzimet mujore për karburant janë mesatarisht 300-400 euro, ndërsa shpenzimet telefonike arrijnë deri në 200 euro në muaj, veçanërisht për kryetarët e komisioneve parlamentare. Dietat për udhëtime brenda vendit mund të arrijnë deri në 1,500 euro në muaj. Ndërkohë, Kuvendi mbulon qiranë deri në 35,000 lekë në muaj për 21 deputetë që nuk kanë banesë në kryeqytet.
Megjithatë, disa deputetë, si Lulzim Basha, kanë deklaruar se nga shtatori 2024 nuk kanë përfituar asnjë shtesë përtej pagës bazë, duke refuzuar rimbursimet për karburant, qira apo dieta. Po ashtu, deputetë të tjerë si Fatmir Xhafaj, Lindita Nikolla dhe Agron Shehaj rezultojnë të kenë qenë më të kujdesshëm në përdorimin e përfitimeve shtesë.
Nga burimet e administratës së Kuvendit mësohet se figura si Klotilda Bushka, Mimi Kodheli dhe Jorida Tabaku përfitojnë deri në 20,000 lekë në muaj për shpenzime telefonike, si dhe dieta të shtuar për angazhimet në komisione apo takime ndërkombëtare.
Një shqetësim i veçantë qëndron te mungesa e mekanizmave për verifikimin e banesave të deputetëve që përfitojnë qira. Gazetarja Skënderi thekson se nëse rezulton që disa prej tyre posedojnë banesa në Tiranë, atëherë përfitimi i qirasë nga fondet publike do të përbënte shkelje ligjore.
Në këtë kuadër, një nga deputetët më modestë në përdorimin e telefonisë është Agron Gjekmarkaj, i cili shpenzon mesatarisht vetëm 2,000 deri në 7,000 lekë në muaj, shumë më pak se kolegët e tij që arrijnë në 17,000 deri në 20,000 lekë në muaj.
Në një kohë kur vendi përballet me sfida ekonomike, kostot për mirëmbajtjen e klasës politike mbeten të larta, duke nxitur nevojën për rishikim të skemave të përfitimeve dhe vendosjen e kritereve më të rrepta të transparencës dhe kontrollit, përfundon raportimi i gazetares Arestina Skënderi.
