Shqipëria ka shënuar një tjetër rekord kombëtar në vitin 2024: për herë të parë në historinë e saj, numri i automjeteve në qarkullim ka arritur në afro 1 milion. Sipas të dhënave më të fundit të Institutit të Statistikave (INSTAT), në fund të vitit të kaluar ishin të regjistruara 959,226 mjete rrugore, një rritje prej 10.5% krahasuar me vitin 2023.

Rritja e përdorimit të makinës private është reflektuar edhe në raportin për 1 mijë banorë, i cili është rritur nga 292 në 328 autovetura. Në disa qytete kjo shifër është ndjeshëm më e lartë – Durrësi ka regjistruar 483 autovetura për 1 mijë banorë, duke u renditur ndër zonat më të ngarkuara me trafik në vend.

Qarku i Tiranës mban peshën më të madhe të makinave në Shqipëri, me 34.8% të totalit kombëtar, duke e konfirmuar edhe një herë si qendrën absolute të qarkullimit rrugor në vend.

Makinat e vjetra ende dominojnë, por pritet një përmirësim
Pavarësisht rritjes numerike, pjesa më e madhe e flotës rrugore në Shqipëri vazhdon të jetë e amortizuar. Sipas INSTAT, 47.9% e mjeteve kanë një moshë nga 11 deri në 20 vjet, ndërsa 58.8% përdorin ende kambio manuale.

Megjithatë, vihet re një prirje pozitive drejt rinovimit të flotës, me një rritje prej 44.4% të mjeteve të prodhuara pas vitit 2011, një tregues i kthesës së ngadaltë drejt mjeteve më të reja dhe më ekologjike.

Nafta dominon, por makinat elektrike po rriten
Nafta mbetet mbretëresha e rrugëve shqiptare, me 72.9% të mjeteve që funksionojnë me këtë lëndë djegëse. Megjithatë, ajo që bie në sy është dyfishimi i numrit të makinave elektrike krahasuar me një vit më parë, duke sinjalizuar një ndryshim të ngadaltë, por të qëndrueshëm, drejt mjeteve të pastra.

Ky trend i ri mund të përshpejtohet në vitet e ardhshme, nëse mbështetet me politika të qëndrueshme subvencionimi dhe infrastrukturë të përshtatshme për karikimin e mjeteve elektrike.