Instituti i Studimeve Politike (ISP) ka kërkuar nga Kuvendi i Shqipërisë verifikimin e mandatit të deputetit Florenc Spaho, pas informacioneve publike që ai është emëruar në krye të një detyre ekzekutive në sektorin shëndetësor, përkatësisht si drejtor i Qendrës Spitalore Universitare “Nënë Tereza” (QSUT).
Sipas Kushtetutës së Republikës së Shqipërisë, ushtrimi i një funksioni tjetër shtetëror është i papajtueshëm me mandatin e deputetit, përjashtuar rastin kur deputeti është edhe anëtar i Këshillit të Ministrave.
Kushtetuta është e qartë: Asnjë detyrë tjetër shtetërore për deputetin
Neni 70 i Kushtetutës përcakton: “Deputetët nuk mund të ushtrojnë njëkohësisht asnjë detyrë tjetër shtetërore, përveç asaj të anëtarit të Këshillit të Ministrave.”
Ky parim është konfirmuar edhe nga Gjykata Kushtetuese në disa vendime historike, si V-44/2011 dhe V-32/2016, të cilat kanë çuar në përfundimin e mandatit të deputetëve për shkak të papajtueshmërisë funksionale.
Mandati i Spahos ende aktiv
Sipas dokumenteve zyrtare të Kuvendit të Shqipërisë, Florenc Spaho ka marrë mandatin më 10 shtator 2021 dhe e përfundon më 10 shtator 2025. Ndërkohë, në faqen zyrtare të QSUT rezulton se Spaho ka nisur aktivitetin si drejtor që më 24 korrik 2025.
Kjo përkon me një periudhë kur ai është ende në detyrë si deputet, duke e bërë emërimin dhe ushtrimin e funksionit të ri të dyshimtë në raport me standardet kushtetuese.
ISP: Verifikoni papajtueshmërinë
Në një letër zyrtare drejtuar Kryetares së Kuvendit, ISP ka kërkuar të ndërmerren hapat ligjorë për verifikimin e rastit në fjalë dhe për respektimin e parimit të papajtueshmërisë së funksioneve publike.
Sipas praktikës ligjore, në rast të dyshimit për shkelje, me mocion të kryetarit të Kuvendit ose 1/10 e deputetëve, Kuvendi mund t’ia kalojë çështjen për shqyrtim Gjykatës Kushtetuese, e cila konstaton papajtueshmërinë dhe vendos përfundimin e mandatit.
Precedent që mund të vendosë standard
Ky rast mund të rikthejë në vëmendje nevojën për ndarjen e qartë të pushteteve dhe për moslejimin e ndërthurjes së funksioneve publike, sidomos në një kohë kur besimi në institucionet është i ulët dhe ligjshmëria në administratën publike është vazhdimisht në diskutim.
