Avokati i njohur Besart Logu, është nën hetim nga Prokuroria e Posaçme Kundër Korrupsionit dhe Krimit të Organizuar (SPAK), e cila ka vendosur ndaj tij masën e sigurisë arrest shtëpie. Ai dyshohet se ka kryer veprën penale të ushtrimit të ndikimit të paligjshëm, pasi dyshohet se ka marrë 8 mijë euro nga një klient për të ndikuar në një vendim gjyqësor.

Operacioni i SPAK dhe i Byrosë Kombëtare të Hetimit (BKH) është ende në vijim. Oficerët po kryejnë kontrolle në zyrën e tij dhe në disa lokacione të tjera, ndërsa Prokuroria nuk ka dhënë ende një njoftim të plotë zyrtar mbi detajet e hetimit. Burime nga hetimi bëjnë me dije se Logu dyshohet të ketë premtuar përdorimin e ndikimit të tij për të favorizuar një klient në një çështje gjyqësore.

Besart Logu është një figurë e njohur në skenën juridike dhe politike shqiptare. Ai ka qenë më parë anëtar i Këshillit Kombëtar të Partisë Demokratike, anëtari i Kryesisë së PD, pjese e Rithemelimit, dhe ka dalë shpesh në media, duke komentuar mbi çështje politike dhe juridike. Aktiviteti i tij politik dhe i njohurive të tij juridike e kanë bërë një person me influencë, gjë që sipas hetuesve e bën më të ndjeshëm ndaj dyshimeve për ndikim të paligjshëm.

Hetimi i SPAK është pjesë e një angazhimi më të gjerë për të adresuar korrupsionin dhe ndikimin e paligjshëm në institucionet e vendit. Rasti ka tërhequr vëmendjen e publikut, pasi përfshin një avokat të njohur dhe i vendos sërish institucionet e drejtësisë në qendër të debatit mbi integritetin profesional dhe etikën juridike.

Ndërkohë, autoritetet vazhdojnë kontrollet dhe mbledhjen e provave, duke përfshirë dokumente dhe regjistrime që mund të ndihmojnë në hetimin e plotë të çështjes. SPAK ka theksuar më parë se veprimet e tilla nuk do të tolerohen, pavarësisht statusit apo pozicionit të personave të përfshirë.

Rasti pritet të sjellë zhvillime të reja në ditët në vijim, ndërsa opinioni publik dhe komuniteti juridik do të ndjekin me kujdes ecurinë e hetimeve.