Britania e Madhe po përballet me një nga skandalet më të rënda politike të viteve të fundit, pas zbulimit të komunikimeve sekrete mes Lord Peter Mandelson dhe miliarderit Jeffrey Epstein, i dënuar për pedofili. Zbulimet kanë shkaktuar tronditje institucionale dhe presion të fortë politik, ndërsa hetimet kanë vënë në qendër dyshimet për rrjedhje informacioni të klasifikuar shtetëror.
Ish-kryeministri Gordon Brown reagoi ashpër, duke e cilësuar çështjen si një “krim ekonomik” dhe një “tradhti ndaj gjithçkaje që përfaqëson Britania si shtet”. Sipas tij, informacionet e ndjeshme financiare që dyshohet se i janë kaluar Epsteinit mund të kishin vënë në rrezik monedhën britanike dhe stabilitetin e tregjeve gjatë krizës globale të vitit 2008.
Hetimi i Policisë Metropolitane ka përfshirë bastisjen e dy pronave të lidhura me Mandelson në Londër, ku janë gjetur prova që lidhen me komunikime dhe shkëmbime informacioni të ndjeshëm. Dokumentet e rrjedhura tregojnë se Mandelson i ka dhënë Epstein-it të dhëna mbi planet e Thesarit britanik për taksën mbi bonuset e bankierëve, si dhe diskutime për politika financiare që nuk ishin publike.
Sipas burimeve hetimore, këto informacione mund të ishin përdorur për spekulime financiare në një periudhë kritike për ekonominë globale. “Ky është informacion i klasifikuar. Ai e vuri Britaninë në rrezik”, deklaroi Brown për BBC Radio 4.
Pas shpërthimit të skandalit, Lord Mandelson dha dorëheqjen nga Partia Laburiste dhe nga Dhoma e Lordëve. Ndërkohë, kryeministri aktual Keir Starmer po përballet me kritika të forta, për shkak të emërimit të Mandelson si ambasador i Mbretërisë së Bashkuar në SHBA në vitin 2024, pavarësisht marrëdhënieve të njohura të tij me Epstein.
Dokumente të tjera zbulojnë se Mandelson kishte ofruar një shtëpi fshatare në Toskan për Epstein dhe kishte negociuar marrëveshje financiare me të, duke ngritur dyshime të mëdha mbi natyrën dhe thellësinë e marrëdhënies mes tyre.
Policia Metropolitane ka bërë të ditur se hetimi vijon dhe se çështja është komplekse, duke kërkuar analizë të detajuar të provave dhe komunikimeve të sekuestruara. Ndërkohë, skandali po konsiderohet si një test serioz për integritetin e klasës politike britanike dhe transparencën institucionale.
