Juristi Bledar Dervishaj, ish-këshilltar i Ilir Meta, është shprehur në mbështetje të projektligjit të propozuar nga Partia Socialiste e Shqipërisë, i cili parashikon përjashtime nga masa e pezullimit nga detyra për kryeministrin dhe gjashtë subjekte të tjera të larta shtetërore.
Duke folur në emisionin Puls në A2CNN, me moderatore Bruna Çifligu, Dervishaj deklaroi se nuk sheh “asgjë të keqe” në këtë nismë dhe se debati për të është i theksuar politik.
Sipas tij, ndryshimet synojnë të plotësojnë një boshllëk ligjor të krijuar që prej ndryshimeve kushtetuese të vitit 2012 nga Kuvendi i Shqipërisë.
“Ky debat nuk duhet bërë fare, sepse nëse Gjykata Kushtetuese e Shqipërisë u nda 4-4 në atë shqyrtim kushtetues të nisur nga kryeministri, kemi një mosmarrëveshje të lindur. Katër anëtarë konstatuan ndërhyrje, ndërsa katër të tjerë evidentuan një boshllëk ligjor të krijuar gjatë ndryshimeve të vitit 2012”, u shpreh Dervishaj.
Ai theksoi se, sipas interpretimit të tij, në atë kohë ligjvënësi hapi rrugë për procedim penal ndaj ministrave, por nuk plotësoi normën përkatëse të nenit 242 të Kodit të Procedurës Penale, duke lënë hapësirë për paqartësi.
“Ky gabim që vetë Kuvendi në 2012-ën, me harresat e tij, e ka krijuar, tani po e plotëson. Nuk ka absolutisht asnjë ndërhyrje, qoftë edhe të vogël, në prishjen e balancave mes pushteteve”, deklaroi ai.
Dervishaj shtoi se katër anëtarët e Gjykatës Kushtetuese, në përshkrimin e tyre publik, lanë të kuptohej se ishte detyrë e ligjvënësit ta saktësonte këtë normë.
“Nuk ka asnjë gjë të keqe. E shoh debatin të theksuar politik. Vullnet politik është një nismë ligjore, por edhe kjo vjen falë një kërkese të bërë evidente nga Gjykata Kushtetuese, pas një debati të krijuar nga kalimi i një kufiri që s’duhej kaluar nga pushteti gjyqësor”, përfundoi juristi.
Projektligji i socialistëve, që prek edhe pozicionin e kryeministrit Edi Rama, ka hapur debat të fortë politik dhe juridik në vend, me opozitën që e kundërshton dhe mazhorancën që e konsideron si sqarim të domosdoshëm ligjor.
