Paga e plotë e presidentes së Bankës Qendrore Evropiane (BQE), Christine Lagarde, rezulton të jetë rreth 50 për qind më e lartë se ajo e deklaruar zyrtarisht, sipas një analize ekskluzive të publikuar nga Financial Times.

Sipas llogaritjeve të FT, Lagarde ka përfituar gjithsej rreth 726 mijë euro gjatë vitit 2024, një shifër rreth 56 për qind më e lartë se paga bazë prej 466 mijë eurosh e bërë publike nga BQE në raportin e saj vjetor.

Kjo e bën Lagarde-n një nga zyrtaret më të paguara në botën e institucioneve publike, me të ardhura pothuajse katër herë më të larta se ato të kryetarit të Rezervës Federale të SHBA-së, Jay Powell. Paga e Powell-it është e përcaktuar nga ligji federal amerikan dhe aktualisht kufizohet në 203 mijë dollarë, ose rreth 172,720 euro.

Megjithëse paga e plotë e presidentes së BQE-së mbetet dukshëm më e ulët krahasuar me drejtuesit ekzekutivë të korporatave të mëdha europiane, analiza e Financial Times nxjerr në pah mungesën e transparencës mbi shpërblimet në Bankën Qendrore Evropiane. Ndryshe nga kompanitë e listuara në bursat e BE-së, BQE nuk i nënshtrohet rregullave të rrepta që kërkojnë një pasqyrë të plotë dhe të detajuar të kompensimit individual të drejtuesve.

Fabio De Masi, eurodeputet dhe kryetar i partisë së majtë populiste gjermane BSW, e cilësoi situatën si “skandaloze”, duke theksuar se drejtori ekzekutiv i Deutsche Bank, Christian Sewing, ofron më shumë transparencë për pagën e tij sesa presidentja e BQE-së. Sewing fitoi rreth 9.8 milionë euro në vitin 2024.

De Masi i bëri thirrje Bankës Qendrore Evropiane të adoptojë standarde të ngjashme me legjislacionin europian për deklarimin e pagave në kompanitë e listuara. “Presidenti i BQE-së dhe zyrtari më i paguar i BE-së duhet të përfaqësojë standardin e artë të llogaridhënies,” deklaroi ai.

Vetëm paga bazë e Christine Lagarde e bën atë zyrtaren më të paguar në Bashkimin Evropian. Për krahasim, paga bazë vjetore e presidentes së Komisionit Evropian, Ursula von der Leyen, është rreth 21 për qind më e ulët.

Sipas analizës së Financial Times, përveç pagës bazë, Lagarde përfiton rreth 135 mijë euro në vit në formën e përfitimeve shtesë, përfshirë strehimin dhe shpenzime të tjera. Raporti vjetor i BQE-së nuk jep të dhëna individuale për këto përfitime për anëtarët e bordit ekzekutiv.

Po ashtu, Lagarde fiton rreth 125 mijë euro në vit nga roli i saj si një nga 18 anëtarët e bordit drejtues të Bankës për Zgjidhje Ndërkombëtare (BIS), e njohur si “banka e bankave qendrore”. Edhe kjo pagesë nuk përmendet në raportin vjetor të BQE-së, ndërsa vetë BIS publikon vetëm shumat totale të paguara për të gjithë anëtarët e bordit.

Analiza e Financial Times ka rihapur debatin mbi transparencën dhe llogaridhënien në institucionet më të larta financiare të Bashkimit Evropian.