Kancelari gjerman Friedrich Merz paralajmëroi të hënën se “plani imperialist i Presidentit rus Vladimir Putin nuk do të përfundonte me pushtimin e Ukrainës, por do të ishte vetëm fillimi”.
“Gjithçka tregon se plani imperialist i Putinit nuk do të mbaronte me pushtimin e Ukrainës, por se do të ishte vetëm fillimi”, tha ai në konferencën vjetore që mblodhi ambasadorët gjermanë.
Merz u shpreh se “po përjetojmë çdo ditë dhe me intensitet në rritje sulme hibride ruse, përfshirë infrastrukturën tonë” dhe vuri në dukje “provokimet e Moskës në Detin e Veriut dhe Baltik”.
Gjermania ka qenë furnizuesi i dytë më i madh i ndihmës ushtarake të Ukrainës që nga fillimi i pushtimit të Rusisë në vitin 2022 dhe ka qenë në gatishmëri të lartë për komplote sabotimi të drejtuara nga Moska.
Merz ka ndërmarrë hapa për të rritur kapacitetet mbrojtëse të Gjermanisë përballë vënies në pikëpyetje të forcës së ardhshme të aleancës transatlantike nga Presidenti i SHBA-ve Donald Trump dhe dëshiron që Gjermania të ketë “ushtrinë më të fortë konvencionale të Evropës”.
“Kemi detyra historike”, tha Merz të hënën, përkatësisht “ndërtimin e një arkitekture të re sigurie që duhet të zgjasë për disa dekada të tjera”./Albania Post
