Gjykata e Shkallës së Parë të Juridiksionit të Përgjithshëm Vlorë ka vendosur konfiskimin e mbi 2 milionë euro pasuri dhe dënimin me 4 vite e 8 muaj burg për shtetasin R.Z., i shpallur fajtor për veprën penale të “Pastrimit të produkteve të veprës penale ose veprimtarisë kriminale”, të parashikuar nga neni 287 i Kodit Penal.
Vendimi i gjykatës vjen pas përfundimit të hetimeve mbi procedimin penal nr.1922, të vitit 2019, ku prokuroria kërkoi deklarimin fajtor të të pandehurit dhe konfiskimin e pasurive të tij. Në bazë të nenit 406 të Kodit të Procedurës Penale, gjykata uli 1/3 e masës së dënimit, duke e dënuar përfundimisht R.Z. me 4 vite e 8 muaj burg.
Në kuadër të konfiskimit, u sekuestruan pasuri të ndryshme, duke përfshirë:
-
Njësi banimi në Vlorë, me sipërfaqe 70m² dhe 50m², në pronësi të R.Z.;
-
Apartamente dhe truall në lagjen “Kushtrimi”, Vlorë, në bashkëpronësi me V.Z. dhe A.M., duke përfshirë apartamente prej 159m², 171m², bodrum 181m² dhe shtesë 4-kate;
-
Tokë arë me sipërfaqe 5,000m² në bashkëpronësi me shtetasit S.Z., L.Z., E.Z., R.Z., V.Z.;
-
Automjet i markës BMW GM730D, në pronësi të R.Z.
Ky vendim për pasuritë e konfiskuara dhe dënimin e R.Z. për pastrimin e parave tregon përpjekjet e drejtësisë shqiptare në luftën kundër krimit të organizuar dhe pastrimit të parave të përfituara nga aktiviteti kriminal.
