Partia Demokratike ka vendosur të mos marrë pjesë në seancën plenare të ditës së martë në Kuvendi i Shqipërisë.
Kreu i grupit parlamentar demokrat, Gazment Bardhi, deklaroi se opozita nuk do të jetë e pranishme në atë që ai e cilësoi si një seancë “të paligjshme”, e thirrur në kundërshtim me Rregulloren e Kuvendit.
Sipas Bardhit, seanca është thirrur jashtë ditës normale të zhvillimit të saj, që është e enjtja, dhe me një rend dite minimal që përfshin vetëm miratimin e procesverbalit dhe njoftime. Ai theksoi se një mbledhje e tillë nuk përbën një seancë të rregullt parlamentare.
“Grupi Parlamentar i Partisë Demokratike vendosi të mos marrë pjesë në seancën plenare të ditës së martë, një seancë e paligjshme, e thirrur në kundërshtim të hapur me Rregulloren e Kuvendit, jashtë ditës normale të saj dhe me rend dite që përfshin vetëm miratim procesverbali dhe njoftime”, u shpreh Bardhi.
Sipas tij, kjo nuk është një seancë normale parlamentare, por një mbledhje e thirrur për axhendën personale të kryeministrit Edi Rama dhe kryetares së Kuvendit Elisa Spiropali, pa një rend dite të miratuar dhe në shkelje të procedurave minimale parlamentare.
Bardhi shtoi se një parlament pa rend dite, pa debat dhe pa të drejtë fjale për opozitën nuk mund të funksionojë si institucion demokratik. Sipas tij, në vend që Kuvendi të merret me problemet reale të qytetarëve dhe të ushtrojë kontroll mbi qeverinë, ai është kthyer në një instrument në shërbim të qeverisë.
Në këtë kuadër, opozita deklaroi se nuk do të bëhet pjesë e asaj që e konsideron një “fasadë parlamentare” dhe se do të përqendrohet në takimet me qytetarët në të gjithë vendin. Bardhi theksoi se prioritet i opozitës gjatë kësaj jave mbetet mobilizimi për protestën e paralajmëruar më 22 mars, duke e cilësuar situatën politike në vend si një sfidë të madhe për demokracinë dhe luftën kundër korrupsionit.
Sipas tij, opozita do të vijojë të qëndrojë pranë qytetarëve dhe të udhëheqë, siç u shpreh ai, “betejën për ndryshim dhe për një qeverisje të përgjegjshme në shërbim të interesit publik”.
