Aktivistja shqiptaro-amerikane Evi Kokalari ka reaguar ashpër ndaj ish-kryeministrit Sali Berisha dhe të birit, Shkëlzen Berisha, duke i akuzuar se po mbajnë peng Partinë Demokratike dhe simbolin e saj.

Në një shkrim të publikuar në rrjetet sociale, Kokalari thekson se “të mbash vulën e PD-së peng, apo t’ia kalosh njerëzve të tu me aprovimin e Shkëlzenit apo kujtdo tjetër, përbën korrupsion politik më vete”. Ajo nënvizon se PD-ja nuk është pronë private e Berishës dhe paralajmëron se përpjekjet për ta trajtuar si trashëgimi familjare do të kenë pasoja të rënda për të dhe brezat e tij.

Kokalari shton se demokratët folën qartë më 11 maj, duke mos mbështetur kryetarin, ndërsa opozita, sipas saj, e bllokuar nga Berisha, ka shërbyer vetëm për të siguruar qëndrimin e Edi Ramës në pushtet për një mandat të katërt.

“Të mbash opozitën peng në fakt është të mbash të gjithë kombin peng, sepse ndryshe nuk do kishim dikë si Rama në mandat të katërt,” shkruan ajo.

Kokalari paralajmëron se nuk do të ndalet në përpjekjet e saj për të marrë kontrollin e partisë dhe për të ndjekur drejtësinë ndaj individëve që, sipas saj, po keqpërdorin PD-në:

“Të vetmin pasion që kam tashti është ta marrë atë vulë, të përjashtoj nga PD, të hap partinë, ta bashkoj bazën dhe ta riformoj atë me mentalitetin tonë të Amerikës. Direkt mbas kësaj të filloj lufta kundrejt Ramës. Koha ku dekriminalizohet korrupsioni dhe mbrohet padrejtësia do marrë fund, dhe juve të gjithë do bëheni shembull që do studiohet nga gjeneratat e ardhshme.”

Reagimi i Kokalari thekson tensionet e brendshme në Partinë Demokratike dhe vazhdimin e debatit mbi drejtimin e saj, ndërsa ajo paralajmëron veprime të mëtejshme për riorganizimin e opozitës dhe sfidimin e qeverisë aktuale.