Drejtori i Përgjithshëm i Policisë së Shtetit, Ilir Proda, ka reaguar pas finalizimit me sukses të disa operacioneve të rëndësishme kundër krimit të organizuar, mes tyre edhe operacioni i fundit në Kukës, zhvilluar në bashkëpunim me Policinë e Kosovës, i cili çoi në sekuestrimin e një sasie të konsiderueshme armësh dhe arrestimin e dy shtetasve kosovarë.

Në një mesazh të publikuar për mediat, Proda theksoi rëndësinë e bashkëpunimit rajonal dhe veprimeve parandaluese:
“Çdo armë e ndaluar është një jetë e shpëtuar. Çdo rrjet i çmontuar është një krim i parandaluar,” – deklaroi ai.

Kreu i Policisë së Shtetit vlerësoi bashkëpunimin me Policinë e Kosovës si një model efektiv për rajonin dhe u bëri thirrje qytetarëve që të jenë bashkëpunues dhe të besojnë te forcat e rendit:
“Policia e Shtetit është e përkushtuar maksimalisht për garantimin e sigurisë në çdo cep të vendit,” – u shpreh Proda.

Në përmbyllje të deklaratës, ai përcolli një mesazh të qartë dhe të prerë:
“Siguria nuk negociohet! Policia dhe qytetarët, një forcë e pandalshme.”