Damian Gjiknuri dhe Oerd Bylykbashi, bashkëkryetarët e Komisionit të Posaçëm Parlamentar për Reformën Zgjedhore, zhvilluan një takim me përfaqësues të ODIHR, në një përpjekje për të avancuar procesin e reformës zgjedhore në vend.

Në këtë takim morën pjesë edhe anëtarët e delegacionit të ODIHR-it, Kakha Inaishvili, Raul Mureșan dhe Nataliya Vasylevska, të cilët u njohën nga afër me ecurinë e deritanishme të punës së komisionit.

Në një postim në Facebook, Gjiknuri bëri të ditur se palët lanë pas përplasjet politike dhe u fokusuan te bashkëpunimi për realizimin e reformës, duke e cilësuar këtë proces si thelbësor për garantimin e standardeve demokratike.

Ai theksoi se javën e ardhshme pritet të prezantohet projektligji i ri për financimin e partive politike, i cili konsiderohet si një ndër prioritetet kryesore të komisionit. Pas miratimit të tij, puna do të vijojë me adresimin e rekomandimeve të ODIHR-it në lidhje me Kodin Zgjedhor.

Sipas Gjiknurit, misioni i ODIHR-it është i angazhuar për të bashkëpunuar ngushtësisht me ekspertët shqiptarë, me qëllim gjetjen e zgjidhjeve teknike që përmbushin standardet më të mira ndërkombëtare për zgjedhjet.

Takimi sinjalizon një klimë më bashkëpunuese mes PS dhe PD për çështje kyçe si reforma zgjedhore, duke rritur pritshmëritë për një proces më gjithëpërfshirës dhe konsensual.