Kryetari i Komisionit për Çështjet Ligjore, Ulsi Manja, ka propozuar ndryshimin e mënyrës së numërimit të votave, duke u rikthyer te praktika e zhvilluar deri në vitin 2005, ku numërimi bëhej direkt në qendrat e votimit dhe jo më në qendrat e grumbullimit të KZAZ-ve.
Manja tha se, me përdorimin e teknologjisë bashkëkohore, procesi do të jetë më i sigurt dhe më i shpejtë, duke bërë të mundur që rezultatet paraprake të dalin në një kohë rekord.
“Duhet të adresohet shpejt procesi i numërimit të votave. Nëse do t’i kthehemi numërimit në qendrat e votimit, është krejtësisht e mundur që edhe rezultati në Shqipëri të dalë jo më shumë se 2 orë pasi mbyllet votimi,” u shpreh Manja.
Ai shtoi se shkaqet që dikur çuan partitë drejt parashikimit të numërimit në qendra të posaçme kanë rënë, duke theksuar se sot janë mbi 5 mijë qendra votimi ku teknologjia mund të shpërndahet lehtësisht.
“Ka ardhur koha të kalojmë te administrimi civil i procesit zgjedhor,” nënvizoi Manja.
Propozimi i tij vjen një ditë pasi kryetari i grupit parlamentar të PS-së, Taulant Balla, deklaroi se mazhoranca parashikon ngritjen e komisionit për reformën zgjedhore.
